هذال قفّى

بعبارات ملؤها الأسى والحزن على فراق ابن العم هذال عايد البتال الذي وافته المنية يوم الأحد 26/10/1421ه كتبت هذه القصيدة في رثاء الفقيد الغالي:
لا والله الا فارق النوم عيني
سيور دنيانا بها الوقت غدار
علمٍ ضرب رمحه صميم الوتيني
لا باس ياقلبٍ عليك الدهر جار
هذال حال البعد بينه وبيني
هذال ولت به صواديف الاقدار
لا وا ابن عمي ترثت الغانميني
ذراعي الايمن الياصار ماصار
خلى الحياة ورافق الميتيني
عساه في رفقة هل الخير الابرار
في جاه من تسجد له الساجديني
ممن عبيده يوم زوغات الابصار
يا اللي لجودك ترجي العابديني
رحماك باللى ودع الدار للدار
ودع من الدنيا مع الراحليني
مشى طريقٍ كلنا فيه عبار
وذي سيرة الدنيا حصاد السنيني
كلٍّ يبي يقفاه قصاف الاعمار
هذال قفى به وانا مقتفيني
ولاحي الا ضاربٍ درب الاسفار
كلٍّ يموت ويفقد الطيبيني
اللي بهم شيمه وحشمه ومقدار
اللي بحزات المواقف تبيني
يلقى بهم ملجا عن الموقف الحار
هذال منهم رافق الاوليني
لعل طوبى مسكنه واف الاشبار
لو المنى ماينفع المرتجيني
ليته بقى لي مكرم الضيف والجار
ليته بقى ما مات ساعد يميني
ولاسمعت اسموعي عنه تال الاخبار
لولاي اسلي خاطري في يقيني
باحث من الواقع دواليب الاسرار
الله يجبر به عزا الصابريني
ويعين من مثلي على المر صبار
عز الله اني خاسرٍ لي ثميني
عز الله اني خاسرٍ راس مخسار
خسرت ساعد من سواعد يديني
وداع يا اللي بالوفا يوم مابار
اليوم ياهذال وينك ويني
وين انت ياراع الوفا عقب الاخيار
في رحمة افضل وارحم الراحميني
في رحمة الارحم من الوالد البار
قولوا معي آمين يا سامعيني
آمين يامنجي عبيده من النار