هدية عيد

يالله حي العيد ويا لله حيه
يا غالي طول علينا غيابه
بعد الظمى والقيظ العيد فيّه
يمطر علينا بالمحبه سحابه
شفت الولد فرحان ويا البنيه
كل لبس للعيد أحلى ثيابه
حتى ليالي العيد صارت وفيه
جابت لنا الغالي ويا مرحبا به
يا واحد بالناس ما فيه زيه
فيه الوضوح وفيه بعض الغرابه
من طيبته خايف يطوله أذيّه
الله يحفظه لي ويحفظ شبابه
أوفيت له صادق وفيني حميه
أخاف لا يافع بشرك الذيابه
ودي بشخصيته معاهم قويه
كل رفع شانه وكل يهابه
لي قصةٍ وياه كانت هنيه
فيها معاني عشق ذوق وطرابه
العيد هذا قدمه لي هديه
أدفا من يدينه وأطعم شرابه
أنا اشهد إنه يستحق التحيه
لكن متى عندي تنوخ ركابه
إن غاب عني من يحل القضيه
ونا باحساسي صوابي صوابه
من حب صادق ما يهمل خويه
ومعروف إن العيد من غاب جابه
يا ليت هذا العيد طول شويه
ولا ترى الأعياد عندي تشابه
ويا ليت أمره دايم في يديه
ولا أنا وياه نبقى قرابه