حنا هل الشيمة

ورقة قديمة

جينا المنازل والنخل بالشعيبي
بس البيوت اثنين معهن توابيع
اثنين والثالث هله بالمغيبي
يا من يرد الزمل يم التسانيع
يا من ينادينا وحنا نجيبي
يا اللي تبي لك ناقة بالمراجيع
تكفى ترى فينا المضارب تصيبي
تجوز فينا الطيبة والمنافيع
وطماعة فينا بعد للبيبي
حنا هل الشيمة بليا تمانيع
هل العطا الواجد والاصل العريبي
وكيف إذا سيرت ما فيه تمنيع
بدلال ما يعرض عليها السريبي
ما همني الا ركيب مجاويع
السمن لايذ والغنم بالعزيبي
ضمر وحفيات واهلن بواتيع
فيها اللغوم مقصصات السبيبي
يبون من يبرا التعب والقواطيع
كبش يسام بصافيات الحليبي
امضيفه خطارنا بالمصاميع
بالعزم والا ماش معنا قضيبي
ان شفت في نفسي مواري تهازيع
ما اطاوع النفس الهنوع تغدي بي
وان شفت في نفسي مواري ترافيع
رفعتها والطيب للي يطيبي
رفعتها والمد فيه التمانيع
والخالق الرازق يبي يعتني بي
عيفي الردي يالابسات المجازيع
عيفيه يا عين القضيب الربيبي
لا تاخذين الا العيال البواتيع
لطامة العايل نحاز الحريبي
تلقى الردى عند القهاوي مكاويع
لعراش والا لقمة ما تثيبي
عجاب بن مبارك الغيداني