حلول اللغز ..

نشرنا في عدد الاسبوع الماضي لغزاً كتبه الشاعر حجب بن ردن العصيمي من محافظة الطائف وكان حله فصل الربيع وقد وردتنا عشرات الحلول ولكثرتها اضطررنا لاستعمال القرعة في الاختيار واعتباراً من هذا العدد سيكون النشر حسب اولوية الوصول.
واليكم ما اختارته القرعة من حلول هذا الاسبوع
الفصول اربعة مابين حلوه ومره
تحت دورة فلكها مقسمة بالحياة
الربيع بنبات العشب يازين بره
زين مجلاس بره بين عشب ومياه
محمد علي السالمي
رفحاء
**************
القحط جعل ربي يكفي الناس شره
جعل ربي يغيث الارض من خير ماه
سيل رحمه مهو سيلٍ يجي به مضره
نهتني بالربيع وكل شخص وهواه
بركات نسيم الشراري
طبرجل
**************
من نظم لغزنا نقول لله دره
والجزيرة تشجع كل واحد هواه
بشروني عسى في القاع مضراب جره
للربيع وحقوق الصيف واللي تلاه
مبارك بن مشراف الجروي
المزاحمية
**************
لغز ابن ردن غنّى فيه والصوت جره
يعجب السامع اللي لاسمع به قراه
يا العصيمي ربيع الارض لله دره
لبس الارض ثوب اخضر وغيّم سماه
عيسى فالح الرشيدي
بريدة
**************
الربيع ان حصل للبدو كله مسره
والحضر يرغبون البر ينعش هواه
وام سالم جميل الصوت قامت تجره
ترفع الصوت مبسوطه بزين الفلاه
سعد صنهات السهلي
الدرعية
**************
يامحب الوطن يا اللي تحبون بره
اسمعوا للعصيمي ويش لغز بناه
ضبط اللغز وزن وقاف لله دره
حله اللي هو الربيع يامن بغاه
**************
ناصر الدين الدوسري
الأفلاج
**************
لغزكم بالجزيرة واقع في مقره
مركز انياب سنه في ربيع حماه
لغزكم يا العصيمي هو ربيع المسرة
زاهي في خضاره يهتني من رآه
عبدالعزيز العوض
الأسياح
**************
اشهد ان العصيمي رجل لله دره
صاغ لغز وصالح قام يسعى وراه
ايتطلب حلوله مره بعد مره
لين صاب الربيع وقال هذا تراه
صالح بن محمد المحيميد
المدينة المنورة
**************
لغزكم يارجال العرف لله دره
كل رجال عارف لغزكم ماغواه
يالعصيمي ترى الربيع مابه مغره
لاضفى فوق دار العز مثل العباه
زيد بن جريد بن سعدا
بريدة
**************
ياتراث الجزيرة مرحبا الف مره
كل جمعة نطالع بالعدد وش حواه
والذي يا العصيمي مايجي غير مره
ذاك فصل الربيع استر منهو رعاه
هندي نابت الغياثاث
الأفلاج
**************
من كتب للجزيرة لغز لله دره
في تراث الجزيرة يسعد اللي قراه
الربيع,, الربيع يسر من هو يمره
والفصول الثلاثة ماتسوي سواه
عبدالرحمن عبدالعالي المطيري
الرياض
**************
آه من طرق قاف بالمعاني نجره
كل ماقلت كامل نقصوا مستواه
يا اهل اللغز كيف الحل نلقى مقره
كان ماهو الربيع اخطيت والحل تاه
نافع الحربي
الرياض
**************
مرحبا عد ماتبدي نجوم المجره
والعصيمي عرفنا مقصده ومغزاه
الربيع الهدف واظن مابه مغره
لانشا مدلهم المزن وامطر سماه
فهد بن شافي الحربي
بريدة
**************
ياحجب فات فصل الصيف واقفا بحره
وابرد الجو يامحلا نسانس هواه
ذاك فصل الربيع يزين ممشى~ ببره
ماحلا بنية بيوت الشعر بالفلاه
سالم مقبل الغرابي الحربي
القيصومة
**************
مرحبا ياهلا مره ومليون مره
بالعصيمي ولغزٍ عاليٍ مستواه
الجواب الربيع وكل شخص يسره
شوفة الارض خضرا والخزامى زماه
صالح عبدالله التميمي
الرس
**************
ياحجب ردن لغزك صعب نغفل ممره
راعي الطيبه لابد نكسب رضاه
زين فصل الربيع الى انتهى الصيف حره
والمجاهيم ترعاها بذيك الفلاه
موسم بن سفر القثامي
الطايف
**************
ياحجب عد ماتبدي نجوم المجره
مرحبا بك ولغزك يفهمه من قراه
ذاك فصل الربيع يسر شوفه وبره
والفصول الثلاثة ماتجي مستواه
نادر مسفر الحويماني
البجادية
**************
العصيمي بنى له لغز لله دره
اشهد انه مصيب وجيد في بناه
من يعرف المعاني يعرفه مايغره
ذاك فصل الربيع,, يسر,, ما اجمل بهاه
زهران عون الله المطيري
بريدة
**************
نصفهم يا الحميدي منتظر ويتشره
حبهم للجزيرة كل عالي رقاه
لكن الوقت نرضى فيه خيره وشره
والربيع ابرك ايام السنه ماحلاه
محمد عبدالكريم الغزي
الزلفي
**************
يا العصيمي معاي ارفع يديك وتحره
الطلب من إله كلنا في رجاه
الحيا بالوطن في كل شبراً وذره
لكل واحد قريّب مايعني خطاه
نايف محمد الاسيد
القريات
**************
مرحبا ياهلا فالصفحة المشمخرة
راسها اللغز يوم ان ضبطوا مستواه
وانت يا اللي كتبت اللغز واخفيت سره
الربيع الجواب الصح، مابه عداه
محمد بن سعد بن غشام آل جناح
القويعية
**************
نشكر اللي جعل ذا الزاوية مستمرة
الحميدي ولا ننسى جميع زملاه
والجواب انظره واقره وبالصوت جره
الربيع وعساه يجي لنا ياعساه
فهد عبدالله الجناحي الخالدي
القويعية
**************
كل شاعر لغوز الشعر لازم تسره
ينبسط دام سمع اللغز والا قراه
ثم يرمع، واذا كانت غلط ماتضره
مير اظن الربيع الرمعة المبتاغاة
سلطان بن عبدالرحمن الشافي الخالدي
**************
ياهلا بالعصيمي والتحية مسره
من ضميري سلام لين ياصل مداه
الربيع الجواب إن كان هذا مقره
يوم كثر النبات الناس كل نصاه
على رشيد الرشيد
رياض الخبراء
**************
الربيع الذي فيه الونس والمسرة
ماحلا شوف ذعلوقة وشوفه حزاه
الله,, الله كريم السيل يجعل مقره
في ربوع الجزيرة ممطر كل ماه
عبدالكريم عبدالله الجبرين
الرياض
**************
قال من زاده الإعجاب شوق ومسرة
مرحبا يا العصيمي عد ذاري هواه
من سعى في طريق الخير لله دره
صار مثل الربيع يشوق منهو نصاه
فهد الجروان
الزلفي
**************
ياحلو ياحجب مشي العصاري ببره
ليا خضرت بالربيع معذيات الفلاه
حل لغزك ماله عامين في نجد جره
مانسينا الربيع وحلو لذة هواه
خليف الحربي
الرياض
**************
العصيمي حجب ياناس لله دره
لغزه اليوم يعجب كل شخص قراه
الفصول اربعة فيهن فصل تحره
وهو فصل الربيع الناس تتبع حياه
عطا الله بن سليمان العطا الله
الزلفي
*****************
مرحبا عد مايمشي على الارض ذره
وعد مالاح براق لمع في سماه
بارق فيه خير ويسقي اللي يمره
والربيع افضل فصول السنة من غلاه
جهاد المطيري
**************
اقبل الخير عقب القيض ماراح حره
باقي ايام وتلوح البروق بسماه
ثم يجيك الربيع اللي بشوفه مسره
بأمر رب جميع الخلق تطلب رضاه
ميثاء العماري
بريدة
**************
ياهلا ياحجب عدد نجوم المجرة
جبت لغز جديد يطرب اللي قراه
يا العصيمي ترى لغزك عرفنا ممره
هو تراه الربيع مونس اللي نصاه
محمد سالم الدوسري
الأفلاج
**************
لو وصلت النجوم ولو وصلت المجره
الفصول اربعة والكون يدرج رحاه
مار ربي عطى فصل الربيع المسره
تمشي الناس خلفه والله اللي عطاه
عبدالله حمد البدر
الزلفي
**************
ياحجب ردن لغزك نعرفه مانغره
ذاك فصل الربيع اللي عليل هواه
جاك حله مادام إنك علينا تشره
في تراث الجزيرة ننشره للقراه
عوض حبيليص الحربي
الخرج
**************
مرحبا بالعصيمي عد نجم المجره
ولغزك اللي برعته يعجب اللي قراه
وجعل غيث نشا رمل الضويحي يمره
والربيع يتهاوش دونه ومن وراه
محمد حمد البدر
الزلفي
**************
العصيمي على ذا اللغز لله دره
ذكر اللي حياة البر غاية مناه
ذكره بالربيع وسجته وسط بره
والنفل ينعش الروح العليلة شذاه
شبيب بن شاهر السبيعي
**************
من يجي للردى ياهل الوفا ويتشره
مايعرف الزمرد يحسب انه حصاه
الهناء والسعادة والرضا والمسره
في عيون الربيع نشوف معنى الحياة
الأيمن