خذ راحتك

ياحزني الدايم تمون
خذ راحتي ماحدٍ يشوفك ويرتاح
شكراً وعفواً ماتقصر وممنون
مارحت لكن مابقى شي ماراح
أخذت بسماتي لصفقتك عربون
وقعدت تجني من خساراتي أرباح
ياحزن يامحبوبتي وش تحرون
وأنا أعزلٍ فأجاني الخصم بسلاح
ماهي شجاعه لو مليتوني طعون
دام الجمل تكثر سكاكينه إن طاح
ضايقكم إني واقف وكلي شجون
واسعدكم إني ناسيٍ شكل الأفراح
أشرح لكم لازال بي صبر وشلون؟
أنا جبل في موقفي وأنتم رياح
شامخ لو تهبون وإلا تهيدون
تجون وتروحون والسد ماباح
دام الهوا لا طعم لاشكل لا لون
الحب وش داعيه ابنساه وارتاح
وشوله أعزم فوق طعناتي طعون؟
وشلون أعالج دامل الجرح بجراح؟
بلحق على مستقبلي كيف بيكون
راح الكثير وباقيٍ عمر ماراح
سلطان بن بتلاء - شاعر سعودي