سطوة العشق

اعتق ضلوعي وفك القيد وأطلقني
يالعشق عذبتني وش مكنك فيّه
روّح بشرك وراك ان قمت تلحقني
ماعاد اطيق السجن فرقاك حريه
مليت من ضيقتك لأشتقت تخنقني
وادور ابسط مساحه وابعد شويّه
لكن لك سطوةٍ لرضاه تسبقني
تقلب مزاجي..تخليني آنانيه
مرات اقول المحبه معه ترهقني
ومرات اقول العمر يبغى محنيّه
وأحيان اشوفه من اغلى الناس يسرقني
وان مافقدت الوعي افقد طواعيّه
يالعنبو هالغرام اللي مغرقني
يالعنبو ساعته شوقه وطاريّه
اقسمت لاجفى دروبك لين تعتقني
وترد لي راحتي وتحرر ايديّه
شحت غصون الغلا لرضاه تورقني
وازرت مزون العشق لاتمنح الميّه
وضاقت بي الذاكره والحزن طوقني
ماعاد افكر سوى وش أخر الجيه