الحقيقة - "على غير سنع"

اسمعوني زين اليوم حاس نفسي خارج التغطية مثل تليفوني القديم واللي"غثني"عشان كذا بنحكي بسرعة في موضوعين... اتفقنا؟ الموضوع الأول أحس انه خطير وراعيه مثل العادة يندفع على غير"سنع"هم يتراجع ويبدا يدور أعذار.
- مستعجلين تبون"القشارة"ترا أمزح ماوراي شي - المهم كون عضو اتحاد كرة القدم يطلع ويشكك في حكم في وسائل الاعلام ويتهمه بأشياء ممكن ترجعه إلى المحاكم من جديد - مثل موضوع الدنوشي والنصر - فهذا شيء ما يمكن ينقبل أبد!
والنتيجة يا سعادة العضو ان اللي شاف المباراة يقول تصريحاتك نفعت... يعني مصلحة ناديك كانت الأهم من كل شي، بما فيها اتحاد الكرة وسمعة حكامنا ورياضتنا... يعني كبيرة، وأتوقع ان المسؤولين ما راح يعدونها... بس أتمنى انك ما تكون تطبق المثل"إذا جيت رايح فكثر...". أما الموضوع الثاني وباختصار جداً على رغم اني ما شفت مباراة الاتفاق والهلال، لكن قريت شكوى الاتفاقيين من الحكم وظلمه لهم في الجرايد، على فكرة العام الماضي أكثر حكم قاد مباريات الهلال بالأرقام، فأنا أقترح إذا مصرين انه لا يحكم للهلال، وفكّونا من التشكيك.
ابن البلد
iabalad@maktoob.com