آه يا سارة

صوتها خلخال في ساق المدى
صبحها ملعون لاسابع ندى
إن حكت تقدح زناد الغيم ويسيل الردى
كلّ نظره من محاجرها غنى
للفقير اللّي يبي يحيا ليومه
في شفايفها ينام الصحو
يصحا النوم من نومه!
آه ياسارة.. وثوب الحزن شقّقني وراح
كنتي أكثر من يقول: إنّ باب الذنب مفتاح السماح!
آه ياسارة
كان وجهك يرتسم في كلّ شي
في عصا البوّاب.. في الحاره
في التفاتات البزارين الصغار
وفالنقوش اللّي على باب العماره!
آه ياسارة
كم تكلّمتي وأنا أرقى السوالف : كلمه كلمه.
حتّى أوصل للكلام اللّي في بالك مابعد قلتيه
كنت أدوّر أيّ كرسي في كلامك.. حتّى أجلس فيه!
والله أدري، ما اتّسع صدري لصدري
والله أدري: أنّي أدري وأدري
انّي كلّما ادري إنّي ادري صرت مدري!
ياجنوني... يالصباح اللّي نفض ريشه على سدرة عيوني
مابقابي غير عاشق علّق أحلامه
على شمّاعة العتمه على جدب الغمام
والتحف نفسه ونام!