دا حالنا إحنا، أجل إيش يكون وضعنا لو فعلاً طبقنا برامج السياحة إل قاعدين نسمع عنها صار لنا سنين؟ وكل جدة غير وإنت طيب.. ولو إنو الجماعة كتر خيرهم سووا شي من لاشي، لكن لسّاعنا بعيدين عن مفهوم السياحة والترفيه ومهرجانات التسوق ، إل الكل ينبسط فيها واقتصاد جدة ينتعش . كيف راح نطور استخدامات السواحل طول ما أقصى طموحاتنا بلكونة على البحر أو طاولة في مطعم جنب الموية، ولو لمّينا من بعض قرشين بلكي أمدانا نأجر كابينة ب 3000 ريال في اليوم، ونضرب مشوار قد إيه طوله علشان نروح نقعد بين أربع جدران !! دا إحنا ساكنين في مدينة طول سواحلها أكثر من 80كم !! وكلنا اليوم كام مليون نفر، بكرة النهار بإذن الله لما يصير عددنا أكثر إيش رايحين نقول لأحفادنا لما يسألوك: صحيح ياجدي كان في بحر نسبح فيه في جدة زي ما بيقولوا أصحابنا في المدرسة ؟؟؟ بلاش البحر ، خلي السايح يجي يشوف تاريخنا إل قاعد يتدهور كل يوم حبة في حارات اليمن والبحر والشام ، يا خسارة الجار والمظلوم .. قد كدة إستغنينا عن تاريخك يا جدة ؟؟؟ مافي أحد يدق على صدره ويقول هادا مشروع ترميم لبيت أجدادي؟ هي الأمانة راح تصرف على بيوت الناس، وتجري وراهم: "بالله ترمرموا بيوتكم قبل لا تيطح وتقتل أحد"!! هي دي محتاجة مفهومية؟ ماهم طبعاً عارفين إنها بلا صيانة تطيح ، ليش نستنى وبعدين نبكي، وما نعطي عيالنا فرصة يشوفوا ويسألوا عن تاريخ أهاليهم !! تاريخ مدينة بكبره وإنت الصادق راح يندثر وينتسى، وبكرة نقول ياريت إل جرى ماكان !! إذا مافينا خير في أصل جدة وماضيها: كيف حايكون فينا خير لحاضرها ومستقبلها؟؟.
