منصورين …منصورين والناصر الله

باقي شهر علي المباراة يادوب نجهز الاعلام ونزين بها الاسواق والمحلات والرواشين اما العلم الكبير اللي راح يغطي المدرج يبغاله دورة وصباحية الين يجهز كمان لازم نحرس الملعب والمعسكر ونبخر زير الموية والمغراف عشان نبرد علي قلوب اللاعبين وياريت تمر علي الخطاط وتشوف ايش عمل في الرسومات وتحتها احلي عبارات اللي اتفاهمنا عليها ولاننسي نذ كر صاحبنا يصبن الفلاين والشراريب بصابون ابو عجلة وفي طريقنا نزبن عند الخياط نتأكد انه سلم الأردية للنادي ونروح للي يفصل الكدايس نشوفه انتهي منها ونجيب احسن اناكل نوديها النادي طيب ياراجل ايش خليت لادارة النادي تعمله لا لا الحكاية مش كدة احنا نعين ونعاون ونتأكد انه الأمور ماشية في السليم لانه هذه المباراة لازم نفوز فيها ونرد القازوز …..
باقي أسبوع علي المباراة وكل شي علي احسن مايرام حتي الاوتوبيس شفناهم دندشوه من جد لَبْس الخشبة تبقي عجبة و الدولاب جهزوه والطيران جربناها وحميناها كله تمااام المراكيز والمقاعد والمقاهي والاسواق لاحديث لهم الا عن المباراة أصوات تعلو وتتحدي وتماري واخري تحلل المباراة وطرف محايد وخايف افا عليك لاتخاف النتيجة مضمونة وفي الجيب كمان .
صباح يوم المباراة
هاه ايش رأيك نروح الملعب جلنكاكي ونصلي الجمعة في المسجد اللي قريب من الملعب ونقطع التذاكر بسرعة ونفرش الأحاريم عشان القايلة حارة علي المدرج وكمان نحجز مكان لرفقانا اللي راح يجوا بعد الصلاة بعد مايتغدوا المندي ولا الحوت ويجيبوا لنا معاهم اللي فيه النصيب .
بعد الصلاة زحمة علي خط البلدة والكمساري يادوب يستلم الاربعة قروش أهازيج طبال صَفِيق جينا نفوز جينا نفوز شبابيك التذاكر قدامها طوابير طويلة عريضة وفي الطرف ناس بتستني يدخلوا بلوشي مع الزحمة او يدخلوا في الشوط الثاني وبدون مايدفعوا الريال والنصف المهم يشوفوا ولو جزء من المباراة بعد صلاة العصر هتاف وتصفيق وتشجيع يتزايد مع نزول اللاعبين الكاس يرجع دولابه
وياخصمنا لاتباري امر الله عليك جاري
وفريقنا جاك ساري
هجمة خطيرة وهدف مين اللي سجل يسأل صاحبه معليش الغبرة ماخلتني انتبه لكن حطها علي الرايق في المقص مدرج فرحان وصوت من خارج المدرج كم النتيجة ومدرج صامت الا من صوت احدهم بلنتي ياحكم حكم ضميرك يرد رفيقه كيف بلنتي والكورة وسط الملعب انتهت المباراة ناس مبسوطة وناس زعلانة ويرجعوا لنفس المكان في الحارة قلنالكم منتوا قدنا والكاس حقنا يرد عليه بسرعة نسيتوا لمن فزناعليكم المرة اللي فاتت ياطيب احنا عيال اليوم طيب الحكم ظلمنا ولعيبتكم دغلين وهدفكم اوف سايت واحد من بعيد يرد المباراة ماكانت طبيعية دول يلعبوا بالشخطة والنقطة يجاوبه الاخر دحين انت مارحت المباراة ايش عرفك يرد عليه اصلا انا شفتها في طشت الغسيل ……
بعد اربعين عام الملاعب صارت مزروعة والمدرجات مزودة بمقاعد جلوس مرقمة والتذاكر والبوابات الكترونية وفضائيات تنقل المباريات وتحللها والاهداف تعاد بالحركة البطيئة من جميع الجوانب والجهات تبدأ الطقطقة بالواتس أب شفتوا كيف فزنا عليكم ياخويا الحكم ظلمنا وما حسب لنا عشرة بلنتيات وهدفكم تسلل رجل كبير في العمر ياهوه ماخلصنا هذه كورة غالب ومغلوب اليوم تفوز وبكرة تخسر لكن نبقي دايما اخوان.