البوح

لأول مرة يتواصل معنا الشاعر الشاب محمد مسعد المطيري بهذا النص (البوح) والذي خص به ( ملامح صبح )وهي أول قصيدة تنشر له بحسب قوله،
إقرأوا محمد مسعد والحكم لكم حيث يقول:
سافر في عز الصمت لمصافح البوح
غامر تعب خلّك لأمانيك سوّاح
حاول تمرّد طيب .. لمعاند جروح
وحاول تكون اكثر مع الضيق مرتاح
منته قليل احساس والعشق مفضوح
وانت تضم الخوف لين الحطب طاح
ياخافقي مالك للافراح مصلوح
خلك حزن يشرق على وجه الأشباح
محدٍ جبر نبضك على سيرة النوح
ولااحدٍ بسامع صوت لو تزعج صياح
الى متى وآجي على الدرب وآروح
لين الصبر جاوز مسافاتي وراح
والى متى وآنا من الليل مجروح
واقلبه جمر المشاعر إليا ناااح
اكتبك في قلبي متاهات وصروح
واقراك ضحكة شوق في درب الاتراح
وانثرك عطر حروف في صفحة الروح
واجمعك في قلبٍ من الوجد فوّاااح
تعال .. لو قلبك من الحزن مذبوح
تعال .. وهموووم التفاكير تنزاح
تعال باب الهمس .. لليل مفتوح
لو كان شمع البعد مع سيرتك ساااح
تعال .. سافر بي عن الصمت والبووح
وانا بكووون اكثر..مع الضيق مرتاح