طاح كرته !

( طاح كرته ) نص شعري يجسد معاناة خاصة خص به الشاعر الجميل غلاب بن عايض قراء صفحة ( ملامح صبح ) ومع شكرنا لتواصله وتقديرنا لحرصه ندعوكم لتشاركونا قراءته لتستمتعوا بما تتميز به شاعريته من عذوبة حيث يقول :
يالغايب اللي تنعش الروح طرياك=وعلى خفوقي كل درب اختصرته
مشاعر الحرمان بالحزن تنعاك=وحبك ما بين ضلوع قلبي قبرته
وجدي على شوفك وحضنك ولاماك=وجد اليتيم اللي من اول صغرته
حفيت قدم رجله على درب الاشواك=بعد توفى والده طاح كرته
حلاوته فالعيد تمره ومسواك=طفلٍ ظروفه في زمانه غدرته
إيه أتوجد بعد طالت جفياك=يزورني طيفك ولن غاب زرته
أمسى نهاري ليل من يوم فرقاك=ولافيه ليل يمرني ماسهرته
الشمس تكسف والكواكب والأفلاك=مستغربه من صبري اللي صبرته
مرت ثمان أعياد وآنا أتحراك=متى تحس بقيمة اللي خسرته ؟
ياليتني عادي عشان اقدر أنساك=ياصاحبٍ مهما نساني ذكرته ,
وياليتني قصرت فالحب وياك=سلمت لك قلبٍ غرير ونحرته
اثر الحصاد اهموم وآلام وأشواك=هذي نتيجة حبي اللي بذرته
كان الزمن على تجافيك وصاك=حملتك الشرهه ووقتي عذرته
اهديت لك قلبٍ عشق طعن شلفاك=ولاباقي الا دمع عينِ ذخرته
معقول ترجع لي بعد ثقلت خطاك=يالغالي اللي من غلاه انتظرته
سالت نفسي جاوبتني سواياك=ماينجبر كسر القزاز إن جبرته !
صحيح احبك وأعشقك وأتمناك=وأعظم بيوت العشق لأجلك صخرته
واعيش هايم همي القاك وأرضاك=وكم بحر هايج لاجل عينك عبرته
لكنك أنسى مستحيل أترجاك=إلا شموخي بعد قلبي كسرته!