(خلني وحدي)

بعد غياب تتواصل معنا الشاعرة (عبير بنت أحمد) من خلال قصيدتها( خلني وحدي ) ومع شكرنا لها ندعوكم لتشاركونا قراءتها حيث تقول:
دخيلك خلني وحدي .. أبستفرد بأحزاني=أبستفرد مع اللي يفهمون القلب وجراحه
تغرك بسمتي لا جيتني مقبل على أحضاني=وانا اتبسّم عشان أمنع خفوقي يكْمل صياحه
متى تفهم بأني لا أبتعدت أبيك تنساني=ولا تذكر سوى أني لا ابتعدت اكيد مرتاحه
ولا ْ تخاف انني أبعد الين الموت يلقاني=أنا لو كنت أهابه ما غفَت في حضني اشباحه
لقيت العالم الوردي سراااااب و كذب وجداني=واعيش بكذبته علّ وعسى ألقى بها واحة
وكل ما مرني حلم ٍ عبث فيني و خلاني=بلا ليل وبلا صبح وبلا روح وبلا راحة
كذا عاثت بي الدنيا فساد وطيبي اشقاني=اذا ضاقت بها .. مديت عمري تفرشه ساحه
كثر ما كان لي صاحب اذا قفّيت عاداني=وكثر ما كنت مرتع للألم، في باله سياحه
نقصني شي .. يفداه اكثر اللي لي ولا ارضاني=كأني طير دون اصبع صغير .. وكسّر جناحه
مردّ أشدّ شِّدة للزوال ../.. وثم تنصاني=كذا ما كني إلا الأرض والشدّات تفاحة
يقولون البشر "صبرٌ جميل" ويعقد لساني=وش آخرة الصبر دام الفرج قد ضاع مفتاحه ؟!
وجيت الحين تقطع خلوتي وتزوّد احزاني=دخيلك ما نقصني جرح تكفي قلبي جراحه