قصيدة للشاعر سعيد بن سعد بن عمر

انا بحترم نفسي عن الهون والمنقود
واجنب ضعيف النفس والدون والعيه
****
اسج القدم وامشي تحت راية ابن سعود
تحت راية التوحيد بأرض السعوديه
****
وربي عظيم الشأن سبحانه المعبود
تكفل برزق الخلق والنيه النيه
****
كريم ودود يفتح الباب للمضهود
عظيم الجلال وغافر الذنب والسيه
****
ورزقي ورزق حمود ومحمد ابن حمود
على الواحد المعبود رب العبوديه
****
وباقدر الغالي وبابذل له المجهود
وباقدم الماجوب وما تقدر ايديه
****
عسى الله يجملنا ونمسك وصاة العود
فانا بوي وصاني وصايا حقوقيه
****
على الدين والتقوى وحق النسب والجود
وحقوق الخوي والضيف والجار مثنيه
****
ولانطرد المقفي ولا نتبع المقرود
ولا ناخذ الدنيا خروص وهقاويه
****
وزلة قريب الجد ماني لها محدود
اغض النظر واصد ماكنها ليه
****
لياجات من غالي فلا كني المقصود
ولياجات من غيره فلاهي ضروريه
****
نعرض بها جو السما في هبوب النود
مافيها على ماقيل لا ذي ولا ذيه
****
هجوسي تراودني على الماقف المحمود
وسلوم العرب تفرض قوانين جبريه
****
احث الخطى يم القدا والأمل موجود
وحياة الأمل فيهاعلاقات وديه
****
انا اقولها والادمي بين نقص وزود
الإنسان مأمور والاوامر سماويه
****
الشاعر/ سعيد بن سعد بن عمر