بسم الله الرحمن الرحيم (استقبل سعادة رئيس بلدية طريب الأستاذ محمد بن سالم الوادعي في مكتبه ببلدية طريب الشاعر خالد بن صالح القحطاني حيث قدم له نيابة عن أهالي طريب وبحضور الأستاذ علي بن شايع آل طمسان درع تذكاري بمناسبة مشاركته بقصيدة شعرية في حفل افتتاح مبنى بلدية طريب يوم الأربعاء الموافق 2 / 8 / 1431ه وقد أعرب الشاعر خالد بن صالح القحطاني لصحيفة طريب عن شكره لرئيس بلدية طريب ولأهالي طريب على هذا التكريم وأنه كان سعيداً بمشاركته في حفل افتتاح مبنى بلدية طريب وتمنى لطريب وأهالي طريب التقدم والازدهار. إضغط على الصورة لمشاهدة الحجم الكامل ويسرنا أن نعرض لكم أبيات القصيدة التي شارك بها الشاعر خالد بن صالح القحطاني في الحفل وقد وعدنا في صحيفة طريب بمشاركات جديدة إن شاء الله : القصيدة : أمطري لي يا سحابة يوم إن البرق لاح=في عيوني برق شاعر وفي راسي قنيب مبتداها بالله أكبر وحيا عالفلاح=يا عزيز ويا كريم ويا سميع ويا مجيب إن سمعنا صوت مذن بلال بن رباح =هش يا هم الثكالي ويا صوت النحيب الله اكبر كلمة الحق في ليل وصباح =هي دوانا خل عنك العيادة والطبيب اقبل اقبل يا قصيدي ولا فيها مزاح =ذاخرنك للمحافل ولليوم العصيب ولي قصيدٍ يا جماعة من الشعر المباح =ما شكا من حب نورة ولا فرقا حبيب إن نعست يقوم ينعس والى من صحت صاح =وان زهمته جاك بالسيف والظهر النجيب بعدها أرعد يا رعاد هبي يا رياح =واقفٍ قدم المطاليق والساس العريب مرحبا ترحيبةٍ كنها الماي القراح =بالضيوف اللي هنيا ولا فيهم غريب مرحبا ترحيبة الشيخ حماي النزاح =مرحبا ترحيبة الذيب لا لاقاه ذيب ويسلمون اللي بنوا ذا الصرح بعزوم وكفاح =كله لعينا وطنا وشمسه ما تغيب يوم شفت الصرح ذا باقول قولٍ مستباح =كيف كنتي يا طريب وكيف صرتي يا طريب واعذروني يا جماعة وعفوا والسماح =ودي ارجع للزمان الشين والوقت الصعيب كانت بلادي من أول كما الأرض البراح =ما تشوف إلا متاهات وجبال وشعيب وكل رجلٍ دون أرضة معه قوم وسلاح =والقبايل صايره بين طلاب وطليب والمعارك قايمة ديف ديف وداح داح =وكل يومٍ فيه جثة ورجّالٍ صويب كانت صكوك الأراضي بالبنادق والرماح =احتزم بالمحزم الصلف وأحرب يا حريب والفقر مثل الجبل والجبل لا ما يزاح =والجهل مثل الحطب والحرب نيران ولهيب ويوم جاء الحكم وجاء حكم الصلاح =غردت كل البلابل وغنى العندليب وأصبحت ذا اليوم جنة وفاح الطيب فاح =وحدوها بالعدل والدين والسور القطيب والشوارع زينوها بالنخل أم اللقاح =ما بقى إلا تقدع التمر والغصن الرطيب والأراضي وزعوها بالمنح والشر طاح =والصكوك موقعة باسم ابن عم ونسيب والمباني لبسوها من العزة وشاح =كنها مثل البنية لما جاها خطيب وكل رَجلٍ يخدم أرضه فيبشر بالنجاح =لو خدمها بس بالفكر والرأي الصويب ولو تعاونا على الخير طاح الشعر طاح =ويصبح اللي جندي على رتبة نقيب ومن يخون أرضه عمى العين مكسور الجناح =جعله السلال والسل والساق العطيب شاعرٍ وقف وغنى وعزّم بالمراح =والعذر قدام الأجواد لا ما هو بعيب ما حضرت إلا أشارك بحفل الافتتاح =وما حضرت إلا حميّا لعينك يا طريب لسماع القصيدة بصوت الشاعر خالد بن صالح القحطاني الدخول على الرابط التالي : http://www.tareebnews.com/voices.php?action=show&id=33 في الختام تتقدم صحيفة طريب بالشكر الجزيل للشاعر خالد بن صالح القحطاني على مشاركته الرائعة متمنين له دوام التوفيق والسداد. والسلام عليكم ورحمة الله وبركاته
