قصيدة رثاء في الشيخ / قبلان بن بجاد بن جديع شيخ شمل قبائل آل الجرو "رحمه الله" ،،، ياسعد مامقصدي حقران=نفسي اسارق مشاعرها أقول يمكن عسى غلطان= واخبار تكذب مصادرها حاولت مير الخبر مازان= صكات بقعا وخابرها من بعدها خيمت الاحزان= والعين فاضت محاجرها واخفيت دمعي من البزران= ونفسي تغص بعبايرها ياموت ليتك خذيت افلان= وفلان واللي امخاشرها وشفيك ماتمهل الشجعان= لاجل السنين ودوايرها وشفيك ماتاخذ النذلان= سلال كبدي وجايرها واعوذ بالله من الشيطان= الاقدار ربي امقدرها مرحوم ياشيخنا قبلان= شيخ المشايخ ونادرها الله يجزاه بالإحسان= الناس بالخير يامرها وان جاه ناسٍ عليها شان= تسلى ويمباج خاطرها وان كان وجه الدعاوي شان= لوهي صعيبة يصخرها وسيع فكر وفصيح ألسان= دليل ماهو يدورها عزالله إنه وسيع ابطان= يحسب عواقب جرايرها كريم لا جا لزومه بان= ماهو يحسب خسايرها له فزعةٍ تشفي البلشان= ياعنك ماهوب ذاخرها الله يقطعتس ياليابان= والله يقطع مواترها مادبلو قوة البيبان= وجسور تردع مخاطرها كود انها تحمي اكحيلان= واجساد ربي مطهرها تحمي جسد طاهرٍ ماخان= ولا المنية ما نخرها الموت له حزه ومحيان= لا جات ترسي بواخرها لابد مانترك الاوطان= الاموات بيموت قابرها راضي بما قدّر الرحمان= وانفوسنا الله يصبرها والشيخ لا ورث الشيخان= ما مات داره معمرها تمشي على منهج الشيبان= اسلومها ماتغيرها يابجاد يامعرب الجدان = عزى القبيلة وناصرها سمعتك جتنا معا العربان= من غير خبري وحاضرها وريث مجدٍ على برهان= وامجاد محدٍ بناكرها والله يرحمك يا قبلان= شيخ المشايخ ونادرها والله يجازيه بالغفران= وانفوسنا الله يصبرها الشاعر / شافي بن سعد بن محمد آل مانع - من دولة الكويت
