للحين واحد صفر على إسبانيا يارب مو حلم !(اخ تعادلوا)

ياهلا والله وغلا بمشاهدينا مدري قرائنا مدري المهم اننا وكالة انباء سنعة ما هي صاحية ما تخرش المية، عاد انتم ما فيكم عجلة، وش وراكم، تقدرون تنطرون شوي لحد مالله يفرجها ونلقط لكم كم خبر يبرد كبودكم عن هالاخبار الماصلة اللي ما دري وش تبي، اول خبر ما حنا مصدقينه بس لازم نذيعه لكم، منتخبنا جاب هدف على إسبانيا براسية من هوساوي، طمر بكل حيلة وشبك على كاسياس هدف ما درى والتف الا الكورة لاصقه بشباكه، كاسياس من الفشلة يسوي نفسه بزعم اني مو متاثر ويمشي ويصفق يالله العبوا شدوا حيلكم، الحين الدقيقة العشرين من الشوط الاول ومنتخبنا لا يزال صافق إسبانيا بهدف، المشكلة اننا لازم نسكر الاستديو بعد شوي ولا راح نعرف النتيجة النهائية، والله قهر، حنا وكالة انباء تحب تعطي جمهورها الاخبار اول بأول، ممكن نخلي الاستديو فاتح بس خايفين، خبركم ذا الحرامية ما يخلون ولا يبقون ولا جاء آخر الليل يتحولون وحوش الله يقلعهم ويمكن لو توفق واحد منهم وسرق مننا مكريفون راح نضطر نقفل شهر كامل على بال ما نشتري مايك بداله، حنا وكالة جديدة توها ناشية وخبركم الازمة الاقتصادية اخنقتنا شوي، الى هالحين كل شي بالمباراة، جو رايق، وكل شي تماما التمام ما عدا شي نغص علينا وخرب جونا الله يهديه، مدري ليش قناة الجزيرة مصرين ينكدون علينا يجيبون نبيل نقشبندي يعلق على مباريات تهمنا، كنهم يبون يدبلون كبودنا، نرجع لجو المباراة، منتخبنا الى النص ساعة الاولى ومنظرهم زين، تحس انهم فريق يجمل، ما كذب عليكم حاط يدي على قلبي خايف من سوالف بالاك فينا وسناتر سامي الجابر، نغزني قلبي باول خمس دقايق من المباراة اول ما شفت عطيف مو قادر يثبت الكورة، احمد عطيف مدري شفيه اليوم كنتروله رايح فيها، يمكن انه زي الكابرس يحتاج يحمي قبل لا يمسك الخط..الله يتمم على خير.. ياناس انتم فاهمين وش معنى إسبانيا؟! وللحين حنا فايزين واحد صفر، لاحد يصحيني يقول انت قاعد تحلم! يارب ما يطلع حلم! افاااا..الحين جاء هدف التعادل جابه ديفيد فيا بالدقيقة واحد وثلاثين ووليد عبدالله يتفرج..اخ يا قهري بس..يا فرحة ما تمت..خلوني اقفل الموضوع وحنا متعادلين!