فرق الحديد عن «الشعير»؟

أكيد لا قريتوا هالعنوان تحسبون أن محاكيكم طايح على راسه كيس رز، مستغربين من الصجة واللجة اللي صارت على أسعار الحديد، اجتماعات واقتراحات ليل نهار حتى تحس أن هالحديد هو مشكلتنا الوحيدة، مع أننا لنا كم سنة وحنا نصايح ونطالب ونشجب ونستنكر من ارتفاع أسعار شغلات ثانية أهم من الحديد ولا حد جاب خبرنا، يوم تبرق بالأمور (انصح بعدم التبريق بالأمور)، والتبريق هو التأمل مع بحلقة العينين والارماش القليل «واللي يرحم والديك لا عاد تشرح»، قلنا إذا تأملت وفكرت تكتشف أن السالفة مهاوش تجار بين بعضهم، تجار الحديد ودهم تكون أسعار الحديد أغلى من الذهب، والتجار الثانين اللي يحتاجون الحديد بتجارتهم عشان يلهطونا حنا يالمساكين يبون الحديد بأرخص شي، يعني ترى هالصجة مو عشان المواطن المسكين اللي وده يبني بيت ويدعي ليل نهار ينزل سعر الحديد، ليه ما حد سوى صجة يوم ارتفعت أسعار حليب الأطفال وللحين شابة نار ولا حد جاب خبر، عشان حليب الأطفال ما فيه تجار ثانين يستخدمونه في تجارتهم، يعني لو كان فيه تجار يحتاجون مسحوق حليب في مصانعهم لتصنيع السمبوسة كان من ثاني يوم تلاقي المشكلة يناقشها الصغير والكبير ويدورون لها حل، يتوقعون أننا مصدقين أن مهايطهم لتنزيل سعر الحديد عشان عيوننا.. كان غيركم أشطر!