لو الحكم سعودي!

يارب احمنا من شر فساد الأرض والبحر وكباري الشوارع، بالله طالبكم فكونا من هالسالفة تراها تمغص البطن وتعور القلب وتسبب التهاب بالأذن الوسطى، خلوني أطلعكم من جو مصايب السيول، اللي طلعت المستخبي، نبي نسولف سواليف استراحات وكشتات، شفتوا قبل البارح الآتي كيف فاز الهلال، أدري كلكم انهبلتوا من مستوى الحكم الأجنبي اللي حكم مباراة الكلاسيكو (أحس أنها بنت عم الاسبرسو)، هالحكم ما شاء الله عليه كنه مركب قوقل إيرث، وكل ما رصد حالة صعب تنكشف اون ورياح الليالي توني وأقول يا علك بعد حكامنا، بالله عليكم يا قراء، تخيلوا لو أن حكم مباراة قبل البارح حكم سعودي، كان من أول ما طاح ياسر القحطاني يمثل بالبلنتي صفر وحسب ضربة جزاء ضد الاتحاد وخلال عشر دقايق انقلبت المباراة فوق تحت وشفنا مباراة تسد النفس وهات يا كروت صفر وكرت أحمر أو أحمرين؛ لأن الحكم السعودي ما يقدر يطرد إلا لاعب واحد من كل فريق، وإذا انحرج لا يطلع كروت أكثر، وتهاوشوا اللاعبين جاك يركض، وصفط بينهم فارد إيديه كنه خيال مآته «ياربي تطلع مآته صح»، أعشيكم من ذبيحة يا قراء إن كان فيه حكم سعودي يقدر يضبط نص اللي صار في مباراة الديربي زي هالأجنبي، أهب يا هو،عقّد ياسر، ما قدر يمشي عليه ولاتمثيليه !