مكافحة كذبة إبريل!

ما راح اتكلم عن اللي صار في مباراة النصر والوصل؛ لأن اللي صار ما له حل الا انك تعتبره ما صار، مثل الهوشة اللي تصير بينك وبين اخوك، وين ما طلع الحق عليه الطرفين خسرانيين، ووقت الهوشة تطلع العقول الكبيرة وتطلع العقول اللي على قد حالها ولا توزن كلامها، خلونا نعتبر اللي صار كذبة ابريل، ونقفل ملف القضية، على طاري كذبة ابريل، امس كان اول ابريل، وادهروا علينا انصار العولمة بمسجات ومقالب عشان يحسون انهم هاي وكلاس، ناس مقالبها خفيفة ولطيفة وناس مقالبها تودي لقسم الطوارئ، المقالة من الاساس ما لها داعي، وش استفيد لاحطيت رفيقي بموقف يمكن يروح فيه، امس واحد من اخوياي المسكين عنده ضغط ومرسل له اخوه مسج: يقول له الحقني امسكتني الشرطة ومعي كميات ممنوعة، يقول خميت الجوال وانا اتراعد وماني قادر اوقف، كيف اخوي اللي اعتبره خوش رجال وقدوة ينمسك من الشرطة، واي شرطة؟ وشلون الحقه؟ اروح للقسم والا اروح لأحد؟ والا ارمي نفسي قدام تريلة تخلصني من الفضيحة،يقول دقيت على اخوي والا الاخ يرد وهو يضحك ويقول لي ماعليش مشت عليك هذي كذبة ابريل، يقول تكفى يابو العريف اكتب الى كتابة هذي السطور وانا احس اني ماني خوش من ارتفاع الضغط ويمكن انام بالمستشفى، ليه كذا يا اخوان؟ وش هالتقليد الاعمى الغبي، ما كل الناس يتحمل المقالب، والكذب كله حرام ولا يجوز، طيب لو طب هالمسكين من طوله ومات؟ ودي كم واحد من هالشباب الفاضين يسوي لنا جمعية اسمها مكافحة كذبة ابريل!