الأمير محمد: الأشرار يستغلونكم.. والانتحاري: أعجبنا وضوحكم معنا

أكدت وزارة الداخلية في بيانها الذي أصدرته أمس أن منفذ الاعتداء الآثم تمكن بعد وصوله إلى السعودية من الاتصال الهاتفي بمساعد وزير الداخلية.. وفيما يلي مقاطع مما تضمنته المكالمة الهاتفية:
الأمير محمد بن نايف: السلام عليكم الأخ عبدالله
المنتحر: نعم نعم.
الأمير محمد بن نايف: كيف الحال.. القوة
المنتحر: الحمد لله كيف حالكم؟
الأمير محمد بن نايف: بخير كل عام وأنتم بخير
المنتحر: وأنت بخير إن شاء الله
الأمير محمد بن نايف: كيف صحتك؟
المنتحر: مبروك رمضان
الأمير محمد بن نايف: الله يبارك فيك عسى ما تعبتوا
المنتحر: الحمد لله
الأمير محمد بن نايف: وشلون أخوك إبراهيم عساه طيب
المنتحر: طيب الحمد لله
الأمير محمد بن نايف: ابشرك ترى الوالد والوالدة كلهم طيبين ولله الحمد أمورهم زينة وكل شيء زين
المنتحر: اللهم لك الحمد
المنتحر: ونسأل الله عز وجل أن يتمم
الأمير محمد بن نايف: اللهم آمين اللهم آمين
المنتحر: عسى الله بييسر الأمور
الأمير محمد بن نايف: أبد الأمور متيسرة ما دام الإنسان يحط الله بين عيونه.. أموره متيسرة
المنتحر: إن شاء الله
الأمير محمد بن نايف: في ذهنك شي ودك تسألني إياه
المنتحر: والله علي أني أقابلك
الأمير محمد بن نايف: أنا وأنا أخوك في جدة وأنت بعيد شوي محلك
المنتحر: أنا ودي أقابلك حتى أعطيك الموضوع كامل لك متى ما تيسرت.. عرفت
الأمير محمد بن نايف: هو أهم شيء الآن عندنا أول شيء أبسأل سؤال تجاوبني عليه جواب.. لأطمئن
المنتحر: أبشر
الأمير محمد بن نايف: طمني عن زوجة سعيد وعن الصغار عسى ما جاهم شي
المنتحر: لا أبد طيبين مرة.. اللهم لك الحمد
الأمير محمد بن نايف: هذولا وأنا أخوك لهم أهل.. فلا بد تراعونهم قبل كل شي، انتبه عليهم تراهم عندي أهم منكم.. أقولها لك بصراحة
المنتحر: بيض الله وجيهكم
الأمير محمد بن نايف: الحين وقلك حطها في وجهي.. أبيك تطمني عنهم قبل كل شي
المنتحر: أعجبنا وضوحكم معنا.. عرفت حتى الشباب مستغربين من تعاملكم
الأمير محمد بن نايف: ليه.. أنتم عيالنا.. ليش مستغربين هالتعامل
المنتحر: بيض الله وجيهكم.
الأمير محمد بن نايف: هذا واجب.. احرصوا.. ترى الأشرار يبون يستغلونكم في كل أمر.. حطوا الله بس بين عيونكم وتعالوا لديرتكم.
المنتحر: وهذا رمضان بإذن الله رمضان خير.
الأمير محمد بن نايف: آمين آمين إن شاء الله دائم.
المنتحر: والله إن شاء الله نسأل الله أن يكفينا الشر ورمضان هذا رمضان خير.
الأمير محمد بن نايف: آمين.
المنتحر: ومتفائلين إن رمضان هذا يعني بيكون نقله.
الأمير محمد بن نايف: بحول الله أول نقله وأنا أخوك تقر عين أهلك فيك هذا أول شي.. ثانيا أنا والله ماني كاذب عليك ودي المرأة هذي وعيالها يجون سالمين غانمين لأن النساء عندنا أولوية في كل شي.
المنتحر: صدقت والله.
الأمير محمد بن نايف: والله أقولك والله يخيروني هالحين بينكم كلكم.. والأهم كان لا أنتم اقعدوا وخلوها تجي.
المنتحر: صحيح والله لو تشوف كيف بنته الصغيرة.. وكيف يوسف.. يعني نسأل الله أن يتممها على خير.
الأمير محمد بن نايف: إن شاء الله يجون وتقر عين أهلهم فيهم.. والمرأه تجي عند والدها وأسرتها.
فالهمام ما عندك هالحين إلا الهمام تعلم إخوانك اللي بيجون قبل ما يستغلونهم الأشرار دون أدني شك
المنتحر: بإذن الله حنا نحبكم في الله وأن الأمور بإذن الله تتم وتتيسر.
الأمير محمد بن نايف: أبشرك الأمور زينة.. وأنا يهمني أهم شي تقر عين والدتك فيك ووالدك.. هذولا بعد مالهم ذنب.. والدك ووالدتك يتجلدون قدام الناس.. ما يبون يشعرون أحد أنهم متأثرين.. ولكن من جوه تعرف قلب الوالد.
المنتحر: أنت كلمتهم.
الأمير محمد بن نايف: والله دائم اسأل عنهم ونكلمهم باتصال.. ولا لي فضل فيها.
المنتحر: أنا كان ودي أدق عليهم.
الأمير محمد بن نايف: دق عليهم.. بس إذا ما كان ما يؤثر عليهم أنهم يحكون عند أحد.
المنتحر: هذي شي.. والشي الثاني ودي أكلم أنا وأخوي إبراهيم مرة واحدة
الأمير محمد بن نايف: أحسن تدري وراه.
المنتحر: لأن لو كلمت لحالي يمكن يخافون من شي.
الأمير محمد بن نايف: الوالد لا.. ممكن يكون متفهم.. لكن والدتك لو تكلمها وأخوك ما كلمها يتهقى فيه شي.
المنتحر: والله ودي أقابلك أشرح لك الوضع كامل
الأمير محمد بن نايف: أبد حياك الله.. لك مني إذا جيت أقعد أنا واياك.. وكل منا يعطي اللي عنده رفيقه، لكن أهم شي الجماعة.. لا يبطون ما أدري وش الأوضاع عندهم.
المنتحر: الجماعة قالوا الشيخ سعيد عجل تقابل أنت مع الأمير وتكلم بعض الشباب متخوف شوي.
الأمير محمد بن نايف: وش متخوفين منه.
المنتحر: مدري بعضهم متخوف.
الأمير محمد بن نايف: معليش محقين، لكن أنتم ما سألتوا عن محمد تراه طيب وبخير وفي بيته.
المنتحر: جانا الخبر والحمد لله.. بعد الخبر ارتحت كثير، وقالوا تكلم الأمير بنفسه ويكلم الشباب وبإذن الله يعطيهم وجه.
الأمير محمد بن نايف: ترى إلا هالحين لو فيه حق خاص أبعلمك أمورنا كلنا تتبع الشريعة، وقد نكون مقصرين في بعض الأمور ولكن عن غير قصد، وما فيه أحد كامل خلني أكون معك صادق.. لكن لو الإنسان قاتل له كان فيه حق خاص ما أقدر أوعدك فيه لين أهل الحق يتنازلون.
المنتحر: بيض الله وجهك.
الأمير محمد بن نايف: ولكن الحمد لله اللي أعرفه الآن انكم ما عندكم حقوق خاصة على أحد.
المنتحر: فإذا قدرت بأسرع وقت ترسل طائرة أو أي شي بحيث أكلم أنا الشباب من عندك.. لأنه إذا كلمتهم من عندك بإذن الله عز وجل خلاص بيطمئنون.
الأمير محمد بن نايف: خلاص اللي ودك.. أنت اللي تقيم هذا الوضع، إذا كان الوضع ينتظر إلي يوم تجيك الطيارة وبتجي الله يحييك.
المنتحر: بيض الله وجهك..
الأمير محمد بن نايف: وإذا كان لا ما ينتظر لا والله الهمام على إخوانك وخلهم يجون.
المنتحر: أجل خلني أكلم ثامر وأرد عليك.
الأمير محمد بن نايف: كلم وشوف وشاور وأنا أخوك بس أهم شي لا تكلم الوالدة الين يصير إبراهيم عندك.
المنتحر: أبشر.. وتكفى إنك تسامحنا لأنها والله إنها يعني ما كانت.
الأمير محمد بن نايف: لا تنخاني يا رجال إني أسامحك أنت ولدنا وأبرك ساعة نبي نكسبك وتعودون لا أحد يستغلكم هذا اللي نبيه.
المنتحر: بإذن الله.