هب.. ودب

بعض تجار في كوكب المريخ، نصابين وحرامية ودامرين كوكبهم بالتزوير والنصب، يجيبون ناس من المريخ، ويصورون بطاقات أحوالهم ويعطونهم على ألف ريال مريخي بالشهر، والموظفين الصدقيين أجانب في أجانب. لخبطوا كوكبهم، سيطروا بفلوسهم على كل شي، ويقول إن كوكب المريخ انهارت فيه الطبقة الوسطى بسببهم وبسبب جشعهم، يعني ما عاد فيه طبقة وسطى بالمريخ، ناس شبعانة وناس مو لاقيه تاكل، كل شي يمشونه بفلوسهم، حتى يقول لك الله لا يبلانا ما يدفعون زكاة أموالهم بشكل صحيح، وبعضهم ما يدفع أبد، وبعضهم يحط راس مال شركته نص مليون وهي راس مالها الحقيقي مليار؛ عشان ما يدفع حق الله في ماله للأيتام والفقارى. حسبي الله عليكم يا تجار المريخ، بس هم ما يدرون انه راح يجي يوم تغص اللقمة بحلوقهم، راح يجي يوم يوصل نظام (من أين لك هذا؟) لكوكب المريخ ثم حلها عاد. يقولون ان بعض تجار المريخ من كثر ما هم مشفوحين على انهم يحطون ايديهم على كل شي، يتصارعون على المناصب مصارع الله لا يوريك، حتى ان بعضهم مسوّي سجلات تجارية بأسماء موظفيه من كم سنة؛ لأنه عارف البير وغطاه، عشان موظفيه يصير لهم صوت ويرشحونه. حسبي الله عليكم يا بعض تجار المريخ! الحمد لله ان الحصى اللي تحذفونه على الأرض ما يوصلنا.. والا كان علوم!