اضحك مع الخطوط

ما فيه مواطن بهالبلد الغالي ما يدعي ويتمنى من كل قلبه أن كل شي يكون عال العال وتمام التمام، بس عاد التمني شي والواقع شي ثاني، والله من قلوبنا نتمنى أن ما فيه أفضل من القطار ولا فيه أفضل من الخطوط حتى ودنا نكون أحسن بلد بالتكاسي بعد، وناسة لاصارت الخدمات ببلدك على سنقه عشرة، تسافر وانت مرتاح وتوصل عظامك سليمة وودك تتمشى من كثر مالرحلة كانت مريحة نفسيا ولا فيها تعقيدات، قبل امس كان عندي مشوار طياري للدمام، قلت بسيطة دام عندي تذكرة كنت قصيتها من اول ادق عليهم واحجز وادخل رقم التذكرة وأفتك من مشوار شراء تذكرة، طبعا كلمت موظف الحجز بالخطوط وانا خانق حالي عشان أخاف ما يهضم صوتي ثم يصكني بكلمة لازم تجي المطار تصف سرى مع حقين الانتظار، ويا كثر ما يقولون لك ما فيه حجز ولا ركبت الطيارة تلقى نصها فاضي وعذرهم ان المسافرين كنسلوا بآخر لحظة، نمشيها، ولازم نمشيها لأن إن ما مشيناها وش راح نسوي ياحسرة، قلت له ياخوك الله يحفظك عندي تذكرة درجة أولى الدمام الرياض والحين أنا بالرياض أبي أروح الدمام وحاجز درجة أولى ممكن تقبل التذكرة، قال لا، قلت ليش؟ قال عشان اختلف خط السير، قلت: ليه هو فيه فرق بالسعر؟ قال لا نفس السعر بس لازم تجي المطار تغير خط السير بدال ماهي الدمام الرياض تخليها الرياض الدمام، قلت كل السالفة شكلية ليه ما تغيرها من عندك تكفى ياخوك، المهم يوم قرب يعصب ويزمر علي فهمت ان مالي غير الله!