عرق النساء

من قبل ابدا التحيه والكلام
وقبل اعايدكم «انا ماني بخير»
كيف اعايدكم قبل رجل السلام
والله انه مايصير ومايصير
عيدي بشوفته من بد الأنام
قصدي ان العيد في شوفته غير
سبعة بحور القصايد ماتلام
مايلام ان جف لوكانه كبير
القصايد تنحني لأعلى مقام
وترضخ القيفان والعاذل يطير
صقرنا ياصقرنا يابن الكرام
من تعبت ووضعنا النفسي خطير
من تعبت وكن عيني في ظلام
احسبني عشت ايامي ضرير
يابو متعب جعلنا دونك حطام
لاتروعنا ترى الخاطر كسير
ماتهنينا بعيد ولا..صيام
من عرفنا انك يابو متعب سِهِير
ليت الارواح تهادى يا الامام
والله ان روحي على دربك تسير
مايعطلها زحام ولاغمام
توصلك وتصير من تحتك حرير
ميلة عقالك الى ذاك البهام
انطوي واصير لاقدامك حصير
شف غلاك يزيد عامن بعد عام
ماحدن غيرك بهالدنيا جدير
ليتني رجلن وادبل الاحترام
والله ان آصلك لوكاني جبير
واتقدم لك واخالف فالنظام
لين اقّبل كفك وكتفك واسير
ياسنام المجد ياراس السنام
البشاره جاتني عبر الأثير
ياحمام السلم طيري ياحمام
بشري العالم وطيري بالعبير
خادم البيتين يبلغنا السلام
نور الشاشه على الشعب الغفير
عرقنا ياعرقنا أرخ اللثام
وانحني لصقر العروبه فالاخير
لنك ياعرق النساء «لذة غرام»
يابخت كل النساء بك يا الكبير
واحمد الله قلتها فمسك الختام
دامك انت بخير فالدنيا بخير