الزهراني: مسرحنا حليو.. واكتفيت بعرض واحد

شاهد عيان من الشارع العام، على مسرحيات العيد ونجومها.. له وجهة نظره تجاه ماتابع من المسرحيات وله رأيه الخاص بالطبع..
كل عام وأنت طيب
كل عام وأنت بصحة وسلامة.
انتهى رمضان بأعماله الدرامية وانتهى أمس موسم المسرح.. وش رأيك في الأجواء الفنية اللي مرينا فيها.
بالنسبة للدراما مستواها كان ضعيف ماعدا عمل أو عملين في مجموع الأعمال السعودية جميعها، أما المسرح ماحضرت إلا مسرحية وحده.
نأخذها وحده وحده.. وش عجبك في الدراما؟
بعض حلقات «طاش» كانت جيدة و«سكتم بكتم» كان حلقاته تمام أما غيرها لم ينجح أحد.
طيب.. وش المسرحية اللي حضرتها؟
حضرت مسرحية «فاصل ونواصل» للفنانين الكويتيين محمد العيدروس وعبدالإمام عبدالله.
وش كانت قصتها؟
تفتح ملفات الفساد وتكشف بعض الحرامية اللي يتلاعبون في أموال الناس.
يعني كانت المسرحية جدية؟
كانت جدية وفيها كوميديا وماعليها، حليوة.
طيب ليش ما حضرت مسرحيات ثانية؟
ماعندي وقت واكتفيت بالعرض هذا، وأتمنى من الجهة المنظمة أنها ما تحصر المسرح في ثلاثة أيام عشان اللي ما قدر يحضر يجي وأنا أعرف ناس جايين من خارج الرياض عشان يستمتعون.
وش الفعاليات اللي حضرتها؟
حضرت العرضات الشعبية وبعض المسابقات.
وش رأيك بالتنظيم؟
أبدا، التنظيم ماعليه كلام.. كل شي ماشي زي الحلاوة والحمد لله والأمور ميسرة.
وش عندك اقتراحات للمسرح؟
أقترح إنهم يجيبون عبدالله السدحان وناصر القصبي عشان يجذبون جمهور أكثر للفعاليات، وإنهم يعطون السينما جزء من اهتمامهم في الأعوام القادمة لأن العروض السينمائية هي اهتمام الشباب الأول.