الموت حق!

اخويانا يوم تشوف تصرفات بعضهم ما تحس أن حياتهم لها قيمة عندهم، ويمكن كلنا زي كذا، اتحداك تلاقي طفيات حريق في اكثر بيوتنا، بالعكس لو دخلت بيت رفيقك وشفت بكل زاوية طفاية حريق او صندوق اسعافات اوليه قمت تنكت عليه وتستنقص تفكيره وتعايره انه خواف من الموت، طبعا اتحداك قد شفت طفاية حريق بطرف مجلس أي بيت تدخله، او في سيارته، تلاقيها في سياراتنا على حالتها من اول ما شرينا السيارة، والله قليل مننا اللي يعرف يستخدمها او حتى يدري وين مكانها، مع ان فيه حالات حوادث كثير، لولا الله ثم وجود طفايات حريق في السيارات كان الوضع مأساة، الحين شف لو صار حريق في سيارة، قليل اللي يجون يتراكضون بطفاية حريق سياراتهم، لأن الاغلبية يجون يتراكضون بس عشان يتفرجون، كله كوم واللي يسافرون دون ما يشيكون على سلامة سياراتهم، يخم اهله ويمسك خط، ثم لا بنشر بنص الطريق، وقف على جنب وقام يؤشر للسيارات، لأن الأخ ما شيك على الكفر السبير ويوم بنشر لقاه منسم ولا يصلح، خصوصا هالايام اللي الحر فيها يبنشر بأطلق كفر سيارة، وفيه ناس يروحون داخل الصحراء ولا هو حاط بباله ولا واحد بالمية انه ممكن يصير شي ويموت عطش ولا حد درى عنه، وكان فك حاله لو اشترى جركل موية، ربعنا اللهم لا شماته ما يفكرون بحل لين يتورطون!