المنتزه الغربي يا وزير العدل

بالبلدي الفصيح

دحين انت يا سيدي لك ساعة زمان وانت غاطس في الغرفة دي وجالس بتنعبش في الجرايد القديمة ايش قاعد بتدوور؟ بأدور يا ستي على جريدة من الجرايد كان فيها خبرين منشورين من فترة وماني عارف فين غطسوا مع كومة الجرايد دي اللي شايفها قدامك.. طيب يا سيدي تبغاني اساعدك وادور معاك؟ لا مشكورة يعطيكي العافية انتي بس روحي زبطي براد الشاهي وخليني انا بعد ما الاقي الجرايد اللي ابغاها اكتب مقال ينعنش الحبايب.. وشوية اسمع ام فتو بتقول وهية شايلة براد الشاهي.. هااه طمني عسى لقيت اللي تبغاه يا سيدي؟ ايوه لقيتها الحمدلله وشوفي الخبر الاول ايش بيقول واللي كان منشور يوم الجمعة بتاريخ 18/10/1432ه واللي كان مكتوب بالبنط العريض (بموافقة الملك الافراج عن 873 ارضا سكنية معطلة من ربع قرن) والخبر التاني كان بتاريخ الخميس 3/7/1433ه واللي برضو كان مكتوب بالبنط العريض (المنتزة الغربي.. وربع قرن من الانتظار) يعني 10 شهور والمشكلة دي لسه ما انحلت.. والله ياسيدي ماني فاهمة شي من اللي جالس تقولوا ؟! طب اجلسي وانا افهمك الحكاية من طقطق لسلام عليكم هادي يا ستي حكاية عمرها اكتر من 26 سنة وفي بعض من ملاك هدا المخطط بيقولوا عمر الحكاية دي اكتر من 32 سنة.. 32 سنة والغلابا من ملاك هدا المخطط مو عارفين يستفيدوا من اراضيهم ولا يبيعوا ولا يبنوا اراضيهم اللي اشتروها بدم قلبهم رغم انه عندهم صكوك شرعية معتمدة تثبت انه هادي الاراضي اراضيهم والمصيبة مو هنا المصيبة انه بعض من اصحابها اشتروها من ايام ما كانت اعمارهم في التلاتين ودحين وصلت اعمارهم في الستينات ولسه الى اليوم ما عرفوا مصير اراضيهم هدا غير انه في بعض من ملاك هدا المخطط ماتوا حسرة وقهر وتركوا اراضيهم لاولادهم وربنا يستر كمان لا يفطسوا الاولاد ويتركوها للاحفاد ويستنوا الاحفاد كمان سنين طويلة عشان يفرحوا بأرض اباءهم واجدادهم وبعدين انا ماني عارف ايش السبب اللي يخلي مخطط فيه حوالي 873 قطعة موقوف الين دحين رغم انه في مخططات كتيره كانت موقوفه لسنين طويلة بس بعد كده افرج عنها الا ده المخطط (الغامض) منت عارف ايش حكايته كل ماراحوا اصحاب هدا المخطط للمحكمة يجيهم الرد فورا بعبارة (عدم استقبال أي طلبات تهميش لصكوك مخطط المنتزة الغربي) هدا غير انه من خوف بعض ملاك هادي الاراضي على اراضيهم من بعض الهوامير صاروا يخيموا فيها.. عشان كده بقول ياحبايبنا يللي في وزارة العدل شوفوا حل لحكاية هدا المخطط وارحموا من في الارض يرحمكم من في السماء لانه من ابسط حقوق المواطن انه يكون له سكن في بلده وكفاية من اللي جالس بيصير في بعض مخططات المنح اللي مانعرفها الا من اسمها لكن للاسف غير موجوده على ارض الواقع لانها مخططات على ورق وبس لكن للاسف ما فيها أي نوع من انواع الخدمات عشان الغلابا يقدروا يسكنوو ويعيشوا فيها لكن الواحد ايش يقول الا عيشوا كتييييير تشوفوا كتييييير.
للتواصل أرسل sms إلى 88548 الاتصالات ,636250 موبايلي, 737701 زين تبدأ بالرمز 127 مسافة ثم الرسالة
Abofatoo@hotmail.com