مذبوحة

قلبي مسيرني ورا ذباحه
اتبع خطاه وتوني مذبوحة
كابرت لكن سد روحي باحه
اسرار صدري دايما مفضوحه
لا من نثرني في مهب رياحه
ايبس فراقه واستغيث جموحه
وسهيل وصله، واليباس اجتاحه
سيل الغلا وانهار كبر صروحه
يفداه قلب مولع برماحه
جاير عليه وطعنته مسموحه
اسهر حبيبي واتعبه وارتاحه
اعطشه، اجوعه وارتوي من روحه
من سلسبيله انتشر له واحه
تطرح جناها في بيادر بوحه
هناك توته، ورده وتفاحه
وهناك مركاه ورضاب جروحه
وهناك ليله، مجلسه وامراحه
وهناك ضحكه، دلته ومزوحه
وهناك ما تشرق لغير اصباحه
شمس الهوى وبيبانه المفتوحه
بيديه قلبي، قفله ومفتاحه
وبيديه عمري يستفز طموحه
قهر يزيد