تحت راية بن سعود

تحت راية بن سعود الله أكبر يا بلاد
يا بلاد ما عشقتي غير راية بن سعود
ذعذعت ريح القصايد يوم هاجوسي زباد
وامتلى صدري بعدها ريح مسك وريح عود
راس مالي كلما ضاقت علي سرج وشداد
واتحرى الزود لوما بعد زود الله زود
لاهدر قدمي بعير وإن صهل توي جواد
آخذ بكار المعاني كسب واسوق القعود
أعشق الوعرة واسريها مع وجه الحماد
لين اوردها بدون شعور لعيون العنود
ما كلينا من ذبايح وقتنا غير الفواد
من خلقنا الله على الدنيا وحن نرقى سنود
(ديننا) و (ملوكنا) و (الدار) صلب الاعتقاد
دونها نفنى ونفني كل من فكر يحود
الثلاث محرمات ودونها قدح الزناد
مثل ومضات البروق ومثل زمجرة الرعود
يا وطنا والله إنه ثالث أيام العياد
يوم بشر عن سلامة درعنا شبل الأسود
بالسلامة سيدي نفداك بأرواح وعتاد
يا محمد يابن نايف كلنا بأمرك جنود
يابن نايف نايف اللي معتلي روس النجاد
للمسالم جنة الله .. للعدا سم الكبود
ليه لا وأنت الذي عينيك جافاها الرقاد
لأجل نمسي في وطنا تحت أمان الله رقود
عينك اللي في سبيل الله.. مضنيها السهاد
تكتحل من رؤية الله وسط جنات الخلود
كيف لا يا منقذ المركب من إعصار الفساد
صغت للعالم باسره كيف فلسفة الصمود
سيدي..لا باس .. تسلم كيد من خطط وكاد
هو يكيد وكيد ربي فوق كيد أعظم حقود
استغل القلب الأبيض والتسامح والوداد
يوم شاف إنه يهلي بالحميم وباللدود
والمسافة خطوتين وفرصته كنها وكاد
ما درى إن الله عظيم وقدرته فوق الحدود
رد كيده في نحره ولا حصد أية حصاد
غير لعنة كل مسلم في الركوع وفي السجود
كل حي أنكر عمله وينكره حتى الجماد
هل جزا من قدم المعروف نكران وجحود
سيدي..يا سيدي لبيك طاعة وانقياد
نارد الموت الحمر ميراد حيم ع العدود
ما نصدر عن عدوده لين نظفر بالمراد
أو نموت بجال عده لأجل تذكرنا الورود
ما قضينا لو قضينا بل لنا أعمار جداد
كل قطرة من دمانا تنبت أجيال وحشود
لو سقط دونك أشاوس قاموا أبطالٍ شداد
فدوة لك يا وطن .. أبناء وآباء وجدود
ما تحس النار فيك إلا جماجمنا رماد
وما تضام وعاد فينا حي وأنفاسه تعود
تحت راية بن سعود الله وأكبر يا بلاد
يا بلاد ما عشقتي غير راية بن سعود