طيب القلب

يا كبر فقد اللي تحبه من الناس
راح واتركني عقب ماعلن رحيله
لاباس يا قلبي من الهم... لاباس
عقبه خلا كوني وحالي... هزيلة
اصيح لحالي بلا عقل واحساس
وليت القدر لاحل يلقى بديله
في خاطري تسعه وتسعين هوجاس
ولا لي على الهوجاس حيل ووسيلة
ضاق الوساع وخاطري حيل محتاس
من عقب خالي كل همن.... اخيله
هذاك خالي طيب القلب والساس
لازاد حملي فوق متني..... يشيله
ذرب الفعول وكاسبٍ كل نوماس
وصيته تعلاّ فوق راس الطويلة
عاش بكرامه دايمن رافع الراس
يالله عسى قبره ظلال...... ظليلة
يا كبر تقديره ورى حدب الأقواس
راعي المعاريف وزبون الجميله
ماعاد لي مع مجمل الناس مجلاس
ولاعاد لي في هرجة الناس.... ميلة
من بعد سبع شهور والوضع حساس
وانا معه لكنّ ما في اليد..... حيلة
اشوف حاله ينقص ويكبر الياس
والهم ما بين الضلوع النحيله
في داخل المشفى وخايف ومحتاس
ولا ادري متى امر الله تعالى يجيله
والله ياحبي له بلا حدّ....... وقياس
ومني تعذّر قبل موته ب ليلة
وهذا قدر ربي على الخلق والناس
ولو العمر يعطى بعمري اجيله
حزني عميق وكاتبه وسط قرطاس
ودموع عيني مثل وبل المخية.....
وصلاة ربي عدّ ماهبّ نسناس
على النبي راعي الهدى والفضيلة