تجاريب الحياة

(من عاش بالحيلات يبشر بالفقر)
ما يكسب الطولات رجالٍ كذوب
الصدق ينجي والعمر سكة سفر
والرزق وقته عند علاّم الغيوب
والادمي لا صار في راسه سطر
ما يفتخر بأفعاله بهرجة قروب
اليا قنصت اقنص لك بمخلب صقر
واليا تعزويت اعتزي لك بمحسوب
لا تعتزي في لاش وقصيّر شبر
حبل الردا لو طال ما يستر عيوب
واليا وردت اورد على طيّب مقر
هداج حزات المواقف والوجوب
واحذر من مخاوى قليلين الصبر
اللي تزعلهم طويلات الدروب
وابعد عن النمام والوجه الودر
اللي يجيك بثوب ويروّح بثوب
تراه لاوكّد خمالك ما ستر
لو ما عليك ذنوب يصنع لك ذنوب
خذ من تجاريب الحياة اصدق عبر
العمر مثل الملح بالدنيا يذوب
من يسمع الاخبار يلقى له خبر
صناعة الفتنة سبب كل الحروب
وعلاج ضيق الصدر ما هو بالابر
سَج القدم بالارض طبٍ للقلوب
كم واحدٍ طاحت عزومه وانثبر
والناس بالطولات غالب ومغلوب
من لا تعزوى بالمعالي ماقدر
اصنع لنفسك شي بالكون الرحوب
المجد بين الناس ما هو بالكبر
تواضعك طيبك يخليك محبوب
ان طاب حظك صار لك شان وقدر
واليا تردّى يلفحك صلف الهبوب