زعيم الأمّة

بسطت الكف في رجوى السحاب اللي يعل البيد
وشعف قلبي سحابٍ يحتضن برقه ورعاده
مسيّرْه الولي لأطْهر بقاع الأرض بالتحديد
ثراها للوجيه المسلمة قبله وسجاده
حماها اللي له التكبير والتهليل والتحميد
ويكفيها شرف بيتٍ هل الإسلام ترتاده
هنا للعز بنيانٍ رفيع وشامخ التشييد
سطوحه من زبرجد والذهب مصبوب بعماده
وهنا لأهل الوجيه البيض فرحة وابتهاجة عيد
تحت ظل الأمان اللي بداره ترسخ اوتاده
هنا دار الفخر والمجد وأهل الدين والتوحيد
وهنا للنور مشْرقْه العظيم وصبْح ميلاده
هنا سلمان بن عبدالعزيز الحاكم الصنديد
تقوم لْه الدول لاشّر وهو جالس على شداده
زعيم الأمّة مْجدّد أملها مِحْكم التسديد
ذرى هذا الوطن حامي حماه وسيّد أسياده
وهنا محمد بن سلمان.. حرّ نظرتْه لبْعيد
شبيه معزي اللي بالشريعه وحّد بلاده
ولي العهد قائد دِفّة التطوير والتجديد
فتح باب الأمل واسرج لداره صهوة جياده
وهنا شعبٍ يأكد وقفته دون الوطن تأكيد
يفادي بالعَمَار ودون حدّه يقدح زناده
عمر داره وردد له تعابير الولا ترديد
ورسم له بالوفا لوحة تغيض قلوب حسّاده
سعودي والسعودي ما يقيده الزمن تقييد
مزج بين التطور والأصالة ترثة أجداده
عريبٍ ما يزلّ عْن الدروب الشامخة ويحيد
عظيم بْوقفته وبْمَدّته وبْزاهي أمجاده
هنا والّا هنا يا أطْهر بقاع الأرض بالتحديد
سقاك الغيث من مزنٍ حضن برقه ورعّاده