الصبر

مل الزمن صبره وملينا الاعذار
اللي مايوليها الضمير اهتمامه
نصف الهموم صقور وصدورنا اوكار
والنصف الاخر حرب جيش ورغامه
الوقت دار وعادة الوقت لا دار
تطيح هامة حلم وتقوم هامة
متى ماضاع الحلم من كفه البار
ضيع مقام اللي عزيزٍ مقامه
والهم ل جاله على الصدر معبار
قام الجفا للضيق يكرب حزامه
صرت اتحاشى: ويش عندك من اخبار؟
اخاف من علمٍ صقيلٍ حسامه
العام كان الحزن طرقي ومرار
واليوم مايقنع ب طيب الاقامه
لقى من يعزمه ويشعم له النار
ويقلطه على فراش الكرامه
ما يحرجه غيمٍ من العين مدرار
ولعاية القمري ونوح الحمامه
للوجد مسياره وللبوح مسيار
لأقفى نهار الصبر واقبل ظلامه
كف الزمن مايعرف الحلم لا جار
يعلم السيف الصريم الصرامه
الوقت دربٍ يتعب انسانه المار
من كل خامة هم يكسيه خامه
يبرك بعير الهقاوي على الزار
سوى بعير شداد ولا مسامه
ويطول عمر الضيق مع طول الاعمار
لين الوجيه تكفن الابتسامه
صد الزمان وصدته للجفا اشعار
حتى غشى وجهه عتاب وملامه
لاصار مال القدر ف الوقت مقدار
سلم على التاريخ يومه وعامه
الصبر له تحية اجلال وكبار
ادام ربي عز عرشه وادامه
عشنا الحياه كبار واحلامنا كبار
واليوم منها مانبا الا السلامه