عِلمنا يرفع الراس

العلم راس وعلمنا يرفع الراس
والمرجلة غبة بحر مالها قيش
إما تعيش تسولف بإسمك الناس
وإلا حرام من الأساس إنك تعيش
بعض الأوادم حبها ماله قياس
تدخل قلوب الناس من غير تفتيش
في كل بطولة مرجلة تاخذ الكاس
واليا انتخيت بذكرها روسها تشيش
وبعض الاوادم ما بها من الله إحساس
رفقة ردا تعشق حياة التهاميش
ما ردها لا طيب أصلٍ ولا ساس
مسترزقه على ظهور الدراويش
سود الليالي إتطلب قوي باس
اللي إلا منه فزع يركبه طيش
ما يحسب الصعبة ولا يعرف الياس
ولا يخاف بدنيته لقمة العيش
هذاك لو إنه مشى فوق الأتعاس
إمشي معه من غير ما تسأله ليش؟
ناسٍ ينومس ذكرها كل نوماس
هذي لها قلوب النشامى معاطيش
واللي فرق بعيوننا ناس عن ناس
إن في بشر معنا حرام إنها تعيش
لو تكشخ وترتز في كل مجلاس
ياكثرهم أهل الوعايد على ميش
الطيب ثوبٍ ما زهى كل لباس
ولا تستر عيوب العفون الدشاديش
إذا وطيت أوطى على روس الأنجاس
وإذا طلعت إطلع مع أول الجيش
واحذر تشوف الناس بعيون الأدناس
حتى تفرّق الحراير من الخيش
موج البحر ما يكسره كل غطاس
ويكسر خشوم النايفات أشقر الريش