شمعة المصباح

رحيل الشمس مولد شمعة المصباح
على شرفة شعور الواقع بنوره
قرا ذكرى وشاف من الحنين اشباح
تكرِّر في عيون الشاعر الصوره
عناقيد الغلا ماتت على الفلاح
خذا فيها العزا غصنين مكسوره
معاريض الدّهر عند الغرام شحاح
معاذير العنا عريا ومستوره
قطين الصيف شدّوا وإرتعش صحصاح
نزل فيه الصبر لين انفجر زوره
رتعه الضيق و امرى مكتسيه وشاح
يواري عن عيون الشّمْت مظهوره
فقد صوت الموادع حزة المرواح
وتلويح الكفوف لعين مجبوره
سمع للروح نوح بنبرة الصدّاح
يغني به سوالف لآخر طيوره
حصى طوية قليبه من فراقه طاح
وفاع إله الحَمَام وضاقت صدوره
هجاد الجرح فجعة تحت زند سلاح
صوايبها شظايا حلم منثوره
نضد حبل الامل زاكي عطر فوّاح
جذب طرقي مشرَّف حال بحظوره
بعد رازم رعوده نور برقه لاح
سرا طرق القصيده طايعٍ شوره
صدى صوته محاسيب و رجيع صياح
مناديب الديون ارقام فاتوره
مخاسير اليدين لسطوة الارباح
على كيس الغناة بروح مخسوره
طوتها الكبريا تنقل حصاة رزاح
تلاحي نجد ماسومه و ممطوره
تفاصيل الوجيه بنظرة اللمّاح
ملامح باقيه من دُور مهجوره
تركِّن فالخرايط نسبه ومفتاح
تميّز بين مهدومه و معموره
علاقات الشعيب مع الجبال ارواح
موّحدها صفير النُود ف صخوره
عفار الارض طاهر والثرا نضّاح
دوا نفس الجريح املاه دكتوره
كلام الريح نَهْتَة صدره المرتاح
بعد يسري صداها معظم الكوره
سدول الليل موتة يومه الّلي راح
من ايام العمر طاويه طابوره
مواليده بزوغ الفجر والإصباح
يصدّرها من الشاعر لجمهوره
شروق الشمس يطفي شمعة المصباح
بعد طلّع حليم النفس عن طوره