هامات الفخر

تسامى يا قصيدي وانتفض عسى الردي يفداك
حضر وقت التجلي والطلب ما يقبل العادي
عساني يوم دورتك على الهقوات فيك القاك
على الحد الجنوبي فوق هامات الفخر بادي
هنا من حقي افخر في تعابيرك وفي معناك
واقول اني كتبت اصدق حروف الشعر في بلادي
هنا حققت لي حلمي ولولا الله ثم لولاك
اموت ويندثر شعري وهو ما حقق مرادي
هنا للمجد والتاريخ وقفة خالدة تنخاك
تدونها بقافٍ يفتخر في حفظه احفادي
هنا ابطالٍ ليا ضمت حروفك ذكرهم وداك
ورى نجم الثريا والجدي من نبضة فؤادي
هنا معنى الشجاعة والتحدي والصمود انباك
عن عزوم الرجال اللي لهم تاريخ وامجادي
هنا يا خادم البيتين يا جعل الولي يرعاك
رجالٍ يستحقون الثناء والمدح بالبادي
جنودك يا ملكنا ما تفج الا نحور عداك
رجال تبهج عيون الصديق وتردع الغادي
رجالٍ كل ما دورت تلقاهم على يمناك
بوقفتهم يعرف القادي اللي ضيّع القادي
نقوم الهم تحيه لا ذكرناهم هنا واهناك
ومن لا قام واقف للبواسل حادرٍ وادي