الدانة ..

الهجوس يجيبها العلم ويودّيها
بارك الله في هواجيسي المليانه
القدا يقتادها والنقا حاديها
حبكها رنّان ورسومها رنّانه
جاب ضامرها السواليف من راويها
وأدري إن الضامره تسبق الرويانه
توّك أعماق المحيطات ياباغيها
والبحر ماكل من جاه جاب الدانه
إزعلت بنت المطاليق وش يرضيها
وأبتلشنا كلنا في رضا الزعلانه
تركز الشارات والرمي مايخطيها
المشوّك عندنا ما أختلف ميزانه
أوّل القصه بينبيك عن تاليها
وتالي القصه يعقّد معك حجانه
القريحه قبل ترضى أمها وآبيها
زعّلت راعي القوافي على قيفانه
الهوا قدامها والخطر قافيها
علموا سجّانها يفتح الزنزانه
ماعليها خلاف مثل أختها وآخيها
والغنيّه داخل القيد والفقرانه
سلعةً بيّاعها بارك لشاريها
والمكاسب حصّلوها وهي الخسرانه
جات بين عيونها وأرخت أذانيها
والنهايه كلها مالها أية خانه
أرخصوها المرجفه وأرخصو غاليها
وكل تاجر قفّل بوجهها دكّانه
صار عاليها المعلاّ على واطيها
وقول بنت فلان ماقام دون فلانه
نجمةً تملى سماها وهو ماليها
وأختلف ميزانها وأختلف ميزانه
كيف مدري بس خلاّقها باليها
وضاعت القمريه وضاعت السمّانه
والقصيده كانهِا ماأعجبت قاريها
بأعتبرها من مشاريعي الخسرانه