اللغز

كان كاتب اللغز الماضي الشاعر عبدلله عبدالعزيز الفرهود من الزلفي والذي يقول:
انشدك .. عن رجلٍ .. يجي بآخر الجيش
اول شجاع يعد .. واول شرودي
موجود ضمن .. مبعّدين المطاريش
ولا هوب .. ضمن .. معرّبين الجدودي
وقد توصل للحل شعرًا :
اللغز حله نعرفه يا اشقر الريش
في هرج ابن شلحاط عده يزودي
تراه حرف الشين ياقايلن ويش
حله ولد منهو يحل العقودي
عبدالله بن نور الاسعدي
اهلا هلا والحل مافيه تشويش
والحل جبته ياسليل الفهودي
الشين بآخر كلمة الجيش والفيش
يالله تساعدنا لحل العقودي
احمد بن ناصر المحرج/الرياض
‫حيا الله اللي ينقش الحرف تنقيش
مبدع وله قاف تعدى الحدودي
شوش بحرف الشين للغز تشويش
و ابحر بقيافانه وبحره يجودي
عبدالله بن عبدالعزيز الصالح الفهد
مشكور يالفرهود وصلت وتعيش
نهديلك الكادي وزهر الورودي
الحل حرف الشين من دون تفتيش
عساك تسلم والمنافع تزودي
علي رشيد الرشيد - رياض الخبراء
يامرحبا بك يابعيد المطاريش
ويامرحبا بك عد من بالوجودي
الحل حرف الشين ماهاش ولا هيس
وانا افتخر في كل واحد سعودي
محمد ابودحيم العريني - البدائع
لغز الخزامى وافي بالتفاتيش
واللي بناه اليوم شاعر سعودي
الحل معروف ولا فيه تطنيش
الشين حرف الشين مثل الشهودي
عبدالمحسن بن محمد المحيسن/رياض الخبراء
سلامن ارسلته مع خافق الريش
للشاعر اللي جعل حظه يزودي
انا لقيت الحل من دون تشويش
الشين حل اللغز جتك الردودي
صالح السنيدي - الحريق
ياللي كتبت اللغز ياجعلك تعيش
عساك دايم عايشٍ بالوجودي
الحل حرف الشين من دون تغشيش
في جملة حروف الهجاء له وجودي
عبيدالله فالح الحربي- من عنيزة
لغزك على معنى وقافك على ايش
اقول ماشاء الله اكرر وعيدي
اللغز واضح مايبي زود تفتيش
حله بحرف الشين ذا مايكودي
صالح البشري
قولو لابن فرهود هو مقصده ويش
اللغز حله لاورد مايكودي
نقول حرف الشين من دون تغشيش
حاولت أحل اللغز وابذل جهودي
سعد صنهات السهلي /الدرعيه
حتى إيش لو تغير النهج حتى إيش
نجيب حل اللغز يابن الفهودي
الحل حرف الشين لوايش وبإيش
صح الله السانك بصح الردودي
سالم بن ظفر الحربي
لغز الأسبوع
يكتبه للصفحة الشاعر
صلاح اليابس من الدمام ويقول:
اللغز سويته ترى الحل بنتين
وأنشدك عن رجلين تطعم وتنذاق
واحد مع أهل الكيف مبطي من سنين
وواحد قسم به ربي قسام الأرزاق
إلا كتبناهم سوى بان للعين
بنتين ما يحتاج يا عذب الاذواق
نستقبل الحلول على البريد الالكتروني
rb-khozama@alriyadh.com
أو الفاكس 014871070
كما نرحب بطرح الألغاز الجيدة
وننوه بعدم المشاركة الازدواجية بين اللغز وصوت الصورة واختيار إحدى الزاوتين.