أصدق شعور بمطلع العيد جالك

يا موطني والعيد أشرق وحياك
والأمة اللي تستظل بظلالك
تزهى ثياب المجد والمجد يزهاك
رقيت فوق النجم مدري رقى لك
الشعب شال أصدق تعابيره وجاك
والعيد فرحه ترجمت ما بدالك
إلى حبيب الشعب مسعد رعاياك
اللي بروحه باع لك واشترالك
يا خادم البيتين طابت سجاياك
مهما كتبنا ما نوفي خصالك
يزف لك شعبك تهانيه وإياك
وأصدق شعور بمطلع العيد جالك
اسم الوطن عليته بعمق رؤياك
وعديت دربه عن دروب المهالك
يا منجد الأمة بلحظات الإدراك
الله يمد بعمرك اللي بقالك
الشعب يفرح عند طلعة محياك
كنّه طلوع البدر في ليل حالك
فتحت له بابك ومديت يمناك
أبيت أن تقطع بشعبك وصالك
وتسأل عن اللي مغترب يدرس هناك
ما كنّه إلا واحدٍ من عيالك
مدّك بعونه خالق الناس وابقاك
للشعب والأمه قويه حبالك
ولك يا ولي العهد دعوات ترعاك
بقلوب شعبٍ بالتهاني مشى لك
ياللي حفظت العهد يحفظك مولاك
وعن العدا سديت كل المسالك
لاتاهت الاريا والافكار ننصاك
نلقى الفرج بأمر الولي من خلالك
ويا سِعد من جالك وهو طالب حماك
ماخاب ظنه فيك يومه لجالك
ويا موطني بالأرض مافيه حلياك
قبلة بني الاسلام ياطيب فالك
الشعب لك صفٍ من ادناك لقصاك
شرقك وغربك والجنوب وشمالك
ضد البعيد ان كان فكر وعاداك
وضد القريب اللي ب شره نوى لك
بأرواحنا يا موطن الجود نفداك
وعند الوعد ما عندنا الا حلالك
باسم علي الوشيل - الزلفي