غنت بلادي بالألحان

مدري شغف ولا وله هز الاكوان
ولاخصالك سيدي تشدنا لك
المملكة في غيبتك عمها احزان
من شايب لطفل يراعي خيالك
واليوم يلبس موطني تاج ريحان
عروس مزدانه للحظة وصالك
تشعل شموع الحب اشكال والوان
والفل تزهي فرحته في ظلالك
فز القصيد يسابقه قلب ولهان
ما تنوصف فرحة خفوق دعالك
يا سيدي ادعي كريم ورحمن
عسى الألم يخطيك ابد ما يطالك
يا سيدي شعري كسير وحيران
يخاف يقصر ما يعدد خصالك
حب الوطن حب العطاء حب الاخوان
وصايف خجلي تبين بفعالك
للخير كفك باسطه رحمة انسان
ما تخذل المحتاج كانه عنالك
كم من كسير تجبره دون خذلان
مدك يمين ماتذيعه شمالك
بسمتك تضوي يانسل عالي الشان
اجمل رسايل ودنا نزفها لك
يا موطني ردد ترانيم شفقان
والبس لباس العز سلطان جالك
وياعز وقف شامخاً لجل سلطان
وارسل تحية لسيدي راس مالك
عضيد ابو متعب ودرعه بالازمان
يعجز خبيث النفس يركن لجالك
يا سيدي غنت بلادي بالالحان
والفرح يكسيها ويكسي رجالك
البسها ابو متعب من الحب فستان
وكساها شوقه يوم وقف قبالك
شيخ الشيوخ مثبت الحق باركان
عبدالله اللي حب قلبه عطالك
نحب ابو متعب ونايف وسلمان
ونحب آل سعود مع حبنا لك
نجدد يابو متعب مواثيق شجعان
جنود الوطن درعك وحنا فداك