دنيا تحير يافتى أول الالباب

الشعر هاض وماطرى الفكر جابه
وسجلت مضمون المفاهيم بكتاب
الله ياوقتٍ كثيرٍ خرابه
ماينتعدل مايل الوقت ياعاب
ماينتعدل يابدابه عيابه
العيب يوجع يابدا بجور الاصحاب
مايوجعك الا اللي تحسّب حسابه
انه صديق لايجٍ دون الاقراب
ويظهر كما اللي مسممٍ راس نابه
سمه زعاف وعضته تعيي الاطباب
اصحاب هذا الوقت مثل الذيابه
تناهشاً خويهن بموجع الناب
حتى ولومن شان حماهن صوابه
يصبح لهن فريسه حين ينصاب
اصحاب هذا الوقت تزهي ثيابه
متمدنينٍ وسلمهم سنة الغاب
الصاحب اللي غرني ضحك نابه
ظهر عدوٍ ماحسبنا له حساب
كم واحدٍ يضحك بلطف وحبابه
حتى يعلق بآمن الصدر نشاب
عجزت اميز زيفها من صوابه
دنيا تحير يافتى أول الالباب
مهما تخفي نيتك يندرابه
تكشف ولوكانت عن الناس بحجاب
تكشف ملامح نيتك سر مابه
تظهر ملامح نيتك وقع الاسباب
وقت المصالح يتعب اللي مشابه
يفتر عضودك بين مرخي وجذاب
بحر غزير يخوفك في عبابه
تماوحك الامواج والفكر منصاب
والجال مضرابه براسي صوابه
وصحيت كنه ناهشٍ عطب الانياب
طواري الماضي فوادي التهابه
حتى وقفت بغبة مالها باب
الماضي اقفى مابقي الا سرابه
سلوم وعادات مثل ريح الاطياب
هذا كلام اللي يجيد الكتابه
اللي تربى مع عريبين الانساب
ربعي افتحو للجود مصراع بابه
ارداهم اللي للمروّات كسّاب
سعيد محمد السالم