بيت وصدى

كان البيت الماضي للشاعر حمد عبدالله الوايلي من حوطة سدير حول ضرورة توعية أولياء الامور بعدم المبالغة في شراء المستلزمات الدراسية مع بداية العام الدراسي ويقول
بسمك الله وابتدى العام الدراسي
اللوازم ﻻ تكثر في عددها
وكان صدى هذا البيت من الشعراء:
لا أبتدا العام الدراسي به حماسي
والمكاتب جاهزة للي قصدها
يا ولي الأمر خلك دوم راسي
المشاري وفره لا جا وعدها
من غلاها كنها لعبة كراسي
والتفاخر أتعب نفوس وقردها
محمد عبدالعزيز الخنيفر - أشيقر
كم تجدد للوازم من مآسي
والمصيبة في بعض ما وجدها
لا تجيب الا الضروري والاساسي
كل طالب يشغله كثرة عددها
كل شخص بالبداية به حماسي
ثم يفتر بعد ما ياصل وعدها
علي رشيد الرشيد - رياض الخبراء
كل ما جاء ترم صدع بي راسي
خص لي دورت حاجة ولا تجدها
يطلبون اغراض وتغيير اللباسي
ولو تعيي راحت الحرمة وولدها
ويطلبون اغراض وشي غير اساسي
البنية من الثقل يفتر جهدها
سعود عبدالعزيز الهزاع - نعام
البداية ما بها غير التعاسي
والمطالب يا صعب منهو سردها
مع ولي الأمر لازم له نواسي
المدارس لا أقبلت يلقى كبدها
السعر بالمكتبة بالحيل قاسي
تتعب الطالب إلى منه قصدها
ريان محمد الخنيفر - الرياض
بيت الاسبوع
تجاوبا مع مقترح الاخ محمد التيماوي من الرياض حول مشكلة القبول في المدارس الحكومية التي تفاقمت في الآونة الاخيرة ارسل الشاعر عساف الغبيوي من الرياض هذا البيت:
المدارس شكت من كثرة الازدحام
صار فيها القبول اصعب من الجامعة
نستقبل صدى هذا البيت بثلاثة أبيات فقط تدور حول هذا الموضوع
ويفضل الإرسال عبر الإيميل:
rb-khozama@alriyadh.com
او على الفاكس (4871070/ 011)
مقترح لموضوع بيت الأسبوع المقبل:
ارسل للصفحة الاخ تركي الدويش من الرياض مقترحا لموضوع بيت الاسبوع القادم وهو المبالغة في اسعار حملات الحج.