بيت وصدى

كان البيت الماضي للشاعر محمد عبدالعزيز الخنيفر حول ضرورة ابعاد مواد التنظيف والمواد الخطرة عن متناول الاطفال للسلامة إذ يقول:
لا تتركون السم عرضة للأطفال
ترى الحذر مطلوب ما تجهلونه
وكان صدى هذا البيت من الشعراء:
يالي تعرفون السنع خيرة رجال
عبر الخزامى هاتو اعذب الحونه
وترى التهاون مايبي زود اهمال
والي تهاون ليتكم تعذلونه
هذي امانه مابها شك وجدال
والقول واضح كلكم تفهمونه
حمد عبدالله الوايلي - حوطه سدير
هذي نصيحة وافهموا العلم يا رجال
واجب على الوالد يركز عيونه
الله من طفل(ن) راح والسبة إهمال
هذا الضنا يا ناس لا تهملونه
لا تتركون الطفل في كل الأحوال
الحرص واجب ما خفا تعرفونه
ريان محمد الخنيفر - أشيقر
اعرف ترى الاطفال بالفعل جهال
الزين عكس الشين مايفهمونه
حط العلاج بموقعاً صعب ينطال
لو حاولو في جيته مايجونه
ترى الحذر مطلوب في كل الاحوال
حذر العلاج اطفالكم يقربونه
سعد صنهات السهلي - الدرعية
ياللي لكم بالعلم وفقه ومنزال
كم واحد بأيديه يطرف عيونه
بأسباب قل العرف مع زود الإهمال
مايستمع للناس لو ينصحونه
ترا دواء الجهال تزويد الأقفال
تسلم من إخطار الصغير وجنونه
علي رشيد الرشيد - رياض الخبراء
بيت الاسبوع:
تجاوبا مع مقترح الاخ محمد بن عبدالله الجعفري من الرياض حول ضرورة توعية أولياء الامور بعدم المبالغة في شراء المستلزمات الدراسية مع بداية العام الدراسي ارسل للصفحة الشاعر حمد عبدالله الوايلي حوطة سدير هذا البيت..
بسم الله لابدى العام الدراسي
اللوازم ﻻتكثر في عددها
نستقبل صدى هذا البيت بثلاثة أبيات فقط تدور حول هذا الموضوع
ويفضل الإرسال عبر الإيميل:
rb-khozama@alriyadh.com
او على الفاكس (4871070/ 011)
مقترح لموضوع بيت الأسبوع المقبل:
ارسل للصفحة الأخ محمد التيماوي من الرياض مقترحاً لموضوع بيت الاسبوع المقبل وهو مشكلة القبول في المدارس الحكومية التي تفاقمت في الآونة الاخيرة.