بيت وصدى

الاسبوع الماضي كان بيت الاسبوع للشاعر ريان محمد الخنيفر من الرياض حول مقترح الأخ فهد بن سالم السالم من الرياض الذي يناقش ظاهرة قراءة الرسائل وكتابتها بالجوال اثناء القيادة وخطرها البالغ على السائقين والذي يقول:
رسايل الجوال تبغى سعة بال
ما تنقري ياناس وقت القياده
وقد كان صدى الشعراء:
كم نفس راحت والسبب كثر الإهمال
خل الرسايل عنك لا تصير عادة
وقت الرسايل كم لها ألف حلال
لا يصير عقلك دايم(ن) في بلادة
قيادة الموتر مهو وقت جوال
وقف وراسل يالفتى في هيادة
محمد بن عبدالعزيز الخنيفر - أشيقر
الله يهدينا لتصريف الاحوال
وتبتعد عنا دروب القرادة
ولا يغرك بالغلط بعض الازوال
ما صار يفرق صحوته من رقاده
ترا التساهل ينتظر منه الاهوال
والقول يعرف ناقصه من وكاده
علي رشيد الرشيد - رياض الخبراء
يالي مسكت الخط ارفق على الحال
واحذر ترى فن القياده ركاده
والى سمعت الي يقولون جوال
ابيك تاقف لين تعرف مراده
خوفي عليك من الحوادث والازلال
كم نفس راحت ماتلاحق عياده
الوقت هو الوقت باقي ولا زال
فرق الدقايق مايسوي زياده
حمد عبدالله الوايلي - حوطة سدير
ياسايق الموتر على الدرب وان طال
راع القياده والقياده زياده
لا تنشغل في غيرها مثل جوال
بعض الشباب اليوم مسرع وعاده
زود عليها منشغل كتب وارسال
رسايل واخطارها في زياده
عبدالمحسن بن محمد المحيسن - رياض الخبراء
يالله انا طالبك يا لله وانا سال
عندالنهايه بس نطق الشهاده
يا مشغلن حالك قياده وجوال
هذا خطا بس انتبه للقياده
هذا على ماقيل ياطيب هبال
والا على ماقيل جهل وقراده
سعد صنهات السهلي الدرعية
فن السواقة يلزمه راحة البال
وأيضاً يبي التركيز وقت القياده
لا تنشغل وقت القيادة بجوال
وتعرض نفوس البشر للإباده
إن كان لك حاجة توقف وبالحال
كلم وأرسل ما تبي في ركاده
ناصر بن جمعان آل عوض - وادي الدواسر
حوادث الجوال تضرب بالأمثال
في كل يومِ تسمعون الإفاده
هذا إنشغل يكتب رسالة على البال
وهذا يكلِّم له ربوعٍ وعاده
نصيحةٍ مني إلى كل رجال
لا تقرب الجوال أثناء القياده
مبارك بن محمد بن حراجم - وادي الدواسر
يا سايق الموتر تذكّر لك عيال
يرجون لك عوده وسق بركاده
لا تهمل الخط ونت عينك ب جوال
كم حادث باسبابها صار عاده
خل الرسايل عنك يا طيب الفال
حوادث بأسبابها في زياده
عبدالرحمن بن أحمد الكنهل - الرياض
أشوف للجوال وقت يالابطال
ولرسايله حَزَّه بغير القياده
وقت القياده به خطوره على الحال
شوموا عنِّه جعلكم للسعاده
نصيحة لأخيار يا طيب الفال
بالمال تنشري لو ثمنها زياده
سعود عائش الحربي
بيت الاسبوع
حول مقترح الأخ فراج الفراج من الرياض الذي يتكلم عن ضرورة الانتباه للسلع الكهربائية المقلدة وخطورتها ووجوب التوعية باضرارها والامل في منعها ارسل للصفحة الشاعر عبيد بن عبدالله بن رمال من المدينة المنورة هذا البيت:
حماية المستهلك اسم بلا افعال
عن المقلد والخطر غمضت عين
نستقبل صدى هذا البيت بثلاثة أبيات فقط تدور حول استنهاض وتنبيه حماية المستهلك للقيام بدورها تجاه هذا الموضوع الذي يمس حياة المواطن والخطر الجسيم الذي سوف ينجم من التساهل فيه ويفضل الإرسال عبر الإيميل.
rb-khozama@alriyadh.com
او على الفاكس (4871070/ 01)
مقترح لموضوع بيت الأسبوع المقبل
ارسل للصفحة الأخ الوليد الطيار من الرياض مقترحا لموضوع بيت الاسبوع القادم وهو الشد على ايدي الامانة في جهودها المبذولة وحملتها في مراقبة المطاعم والاستمرار في ذلك.