يوم الوطن تاريخ مجد وبطولة

يوم الوطن ذكرى بها فرحة اعياد
يوم الوطن تاريخ مجد وبطوله
يوم الوطن هيبه و نخوه وأمجاد
يوم الوطن عزه وتأسيس دوله
دوله صناديد العرب دولة اسياد
دوله لها التاريخ عرضه وطوله
عبدالعزيز أسس ووحد للاحفاد
دوله لها بالمجد صوله وجوله
عبدالعزيز اقبل وله قصد ومراد
وقطع فيافي نجد يشعب ذلوله
وفتح رياض العز من بعد الانكاد
ونادى المنادى فيه حزة وصوله
نادى على المصمك بعد حرب وجهاد
الملك للمعبود والحول حوله
ثم للشجيع اللي له المجد ينقاد
والمجد ما ناله بيسر وسهوله
ناله بحزم وعزم وجهاد حساد
وسيف لتاريخه يسطر فصوله
وشعشع بها نور من العز واسعاد
عقب الظلام اللي تراخت سدوله
ورفرف علم عزه على جبال واوهاد
وحكم بشرع الله وسنة رسوله
وعقبه مع اشباله لها حب ووداد
الحكم راسخ والثقيل ارتكوا له
سعود مع فيصل مغاوير الاولاد
وخالد وفهد المكرمه والرجوله
ملوك أشاويس وهم سادة اجواد
والكل منهم زان فعله وقوله
وعبدالله اللي للمهمات وراد
الله زرع بقلوب شعبه قبوله
ما للسجايا الطيبه فيه تعداد
وابيات شعري عند مدحه خجوله
ما اقول غير انه عمى عين الاضداد
ونفسه لبذل الخير دايم عجوله
عبدالله المحبوب هو طب الاكباد
نفسه عن المدات ما هي ملوله
للخير كساب وللشر صداد
وكسب محبة أمته في شموله
أكرم من الامزان لا حن رعاد
يغلب سحاب الوسم حزة هطوله
لا ضاقت الحيله وجور الزمن زاد
القول قوله والفعايل فعوله
ويالمملكه رغم على أهل الاحقاد
نفديك بالغالين ربع وحموله
حنا لجل حبك جماعات وافراد
لجلك نحارب كل نفس جهوله
واللي يزعزع امنك بحرب وافساد
عليه كون الحرب نقرع طبوله
وتبقين كوكب عز بالكون وقاد
الكون يفنى قبل حزة أفوله