موج البحر

مبروك يا موج البحر كاس مع كاس
كاس الملك مع كاس ولي عهده
أربع بطولات على هامة الرأس
جن الملاعب من هو اليوم قده
يا من تطرز لعبك بفن واحساس
كم من فريق جرح الدمع خده
ذاق الخساره من تحديك واحتاس
ميت يبي يهزمك والموج حده
يشهد لكم در الملاعب مع الناس
ويشهد لكم يوم اللقاء استاد جده
يوم التحدي بين طنجه ومكناس
فالمغرب المضياف كل يعده
ناس تشجع لعبك اجناس واجناس
زعيم ومن شجعك من فيض وده
ما دام أبو سلطان يدفع بلا قياس
من شان عينك بالكرم من يضده
واعضاء شرفك اللي وفاهم على ساس
مجهودهم في كل موقف نعده
يا كبر جمهورك كثر رمل الاطعاس
الليا زاحفوا مثل البحر من يصده
بين النوادي فارق فرقة الماس
من شاف لعبك لازم انك تشده
انتابع اخبارك على البث ومن واس
في كل محفل لك على الفوز هده
زعيم ومعك اصرار ما يدخله ياس
يوعد جماهيره ويوفي بوعده
سعود المسعودي