شاعر وقصيدة

الشاعر عبدالكريم الجباري احد الشعراء الشباب البارزين في شعر النظم ، ومايميز قصائده كونها نابعة من مشاعر صادقة تحاكي واقع المجتمع وتلامس عاداته وتقاليده له العديد من القصائد التي تدل على الشاعرية التي يتمتع بها ومن قصائده التي لفت بها انتباه الآخرين لما يتمتع به من إبداع وموهبة الابيات التالية
هذي هي الدنيا حظوظ وتوافيق
اما وطاك الحظ ولا وطيته
تعيش في غيبوبه الوقت وتفيق
شي تذكرته وشي نسيته
بس الوكاد انه بعد نشفت الريق
مالك سوا بنيانك الي بنيته
والضيق كل انسان به هم به ضيق
ولاكل واحد يسألك به طريته
السد خله دايما فالصناديق
منشان ماتصدم بشي هقيته
والحب لعبه حظ بين العشاشيق
اما نحته نحت ولا محيته
وتبي الصحيح الي عليه المواثيق
الحب حلق شاربي لالقيته
والطيب فعل وله دروب وطواريق
وسوه لوجه الله لامن نويته
وفعلن مهو لك لاتلفقه تلفيق
الحق يظهره الزمن لو كميته
كم واحدن صيته بروس الشواهيق
ولاتسرك سمعته لانصيته
وكم واحدن ماسمعته سمعت طويق
لكن يقوم بواجبك لانخيته
والي يحمل طاقتك فوق ما اتطيق
الي يلومك خبل لو ماعطيته
ياكثر مامروا علي المطافيق
وانا الخطا من يمهم مابديته
لو كنت ادقق في خطا الناس تدقيق
ماكان حب الناس فزت وخذيته
كم مطلبن حاولت اسوقه ولاسيق
حاولت به لكن عجزت وجفيته
واضك همي ضك يين المعاليق
خله مدام ان المعاليق بيته
الرزق عند الله رب المخاليق
ماهو مخيب رجوتك لارجيته
وهذي هي الدنيا حظوظ وتوافيق
اما وطاك الحظ ولا وطيته