صوت الصورة

الجيل الأول كم تعنّى وكابد
من قلّة التعليم والعيشة فقر
البعض ما عنده سوى ثوب واحد
من نصّ كمّه يكبنه خشية القصر
في رزقهم يسعون محدٍ براقد
مشوارهم يبدى بعد طلعة الفجر
مع كل هذا يعمرون المساجد
وعند المطوع درسهم موعده عصر
ناصر بن جمعان آل عوض - وادي الدواسر
ذكرتني يا صاحبي بالكتاتيب
يوم الدراسة توّها في مهدها
فوق التراب الدرس واللوح تخشيب
مدارس واليوم ما كثر عددها
عبد المحسن بن محمد المحيسن
رياض الخبراء
الصوت للصورة كتبناه تحذير
عن المناهج والمهارات بالذات
وأكبر خطر على اللغة قول تطوير
إملاء وقواعد غيّبن واختبارات
والخط معهن والقراءة وتعبير
في درس ومعلّم يخمّن مهارات
فهد بن عقيل الطويان - بريدة
الله يصلحه.. ويخليه
ويحفظه من اعين الحساد
ويصير قرّه لمن يرجيه
وفي طاعة الله على استعداد
عبدالله بن عبود السهلي - تبوك
الصورة اللي بزاوية صوت الصورة منشوره
توثق تاريخ مرحله للبعيد وللقريب
هكذا كان تعليمنا قبل المدارس والسبوره
الشيخ والطلاب سبورتهم لوح الكتاتيب
واليوم نحمد الله هنا العلم يشع نوره
عندنا العالم والمُعلِم والمُهندس والطبيب
محمد سعد الجروي - الرياض
هذا زمان راح وقت الكتاتيب
يا حلو وقته يا بكر في زمانه
تعلموا باللوح.. واللوح تخشيب
إخلاصهم بالعلم صبر وأمانه
واليوم يا كثر التعب والمطاليب
مدارسٍ في كل حي ومكانه
حمد عبدالله الوايلي - حوطة سدير
طاقيته فيها زخاريف ونقوط
والثوب مكبون مقصر من يديه
وشماغه بلا كوي على الرأس مربوط
قبل التطوّر وحاضر اليوم ملغيه
سعود عبدالعزيز الهزاع - نعام
يا حلوها الأيام ذيك القديمه
فيها البساطه والتواصل مع الناس
والكل يتعب فالدروس العظيمه
للعلم حاضر عقل والقلب حساس
بشائر القحطاني - الرياض
صورة العد السابق
نستقبل مشاركاتكم على إيميل الخزامى:
rb-khozama@alriyadh.com
أو الفاكس رقم: 4871070
تنويه
نظراً لازدواجية المشاركات في زاويتي (صوت الصورة واللغز) نعتذر عن نشر تكرار الأسماء في الزاويتين