عواكيس

* الاستاذ معوكس عقبال ما نشوفك عضوا في احدى اللجان عشان نريد منك تطوير العمل ومواكبة العصر بالاحترافية والنتائج السنعة؟
عمرالسليمان - الدمام
- السنعة وين تجي معه والمركز يهبل 226!
* الاخ معكوس المحترم، لماذ صالح النعيمة، وماجد عبدالله، لم تقدم لهما دعوة في انتخابات اتحاد الكرة وهما يعتبران العمود الفقري في الرياضة لدينا هذا اجحاف في حقهما بعدما خدما الوطن في مجال الرياضة؟
بندر العصاي - عنيزة
- (الفيفا) ما يعرف لا عمود فقري ولا عمود انارة!
* العزيز معكوس هل تلقيت دعوة لحضور انتخابات احمد عيد اسوة ببعض الصحفيين المحسوبين علينا خصوصا انك من الجيل السابق في الوسط الرياضي ولك دور مهم؟
نواف الصيخان - حي الفلاح
- كل اللي عندي دعوات عرس في استراحات!
* الاستاذ ابو العواكيس نتشرف ان نقدم لك العضوية الشرفية لنادي الهلال فنحن نتطلع الى دعمك المادي الكبير بعدما سمعنا انك من فئة «الهوامير» والله يزيدك من نعمته؟
متعب صويان الشمر ي
- وانت الصادق من فئة المطافير!
* قاهرهم وحابس دمهم ابو العواكيس، أشوف بعض الاعلاميين المحسوبين على الاهلي وقفوا ازعاج وهجوم على الفرق المنافسة، سبحان مغير الاحوال صوروا الاهلي قبل شهر ولا برشلونة وذا الحين قلبوا عليه ما غير حش في الادارة والمدرب؟
عاشق قلعة الكوؤس - نواف - الرياض
- هذولا هم اللي ضيعوه الين طلع من المولد بلا حمص وتبوله!
* صاحب المليون رسالة ابو العواكيس وش دعوى يا صديقي هاجرنا وتطنش رسايلنا اول كل جمعة ترزني واشوفك عطيتني اشكل عسى ما في الخاطر شي زعلك علي تكفى الا ذي عاد أعتزل سوق الحمام ولا زعلك؟
حمد الدوسري - ابومبارك - سوق الحمام
- لا اعتزل تكفى يا ميسي مالك الا بورصة الضبان!
* الحبيب الغالي معوكس اشوف النصر العالمي وخر عن طريقه حاط رجله شكله ناوي على نيه ها الموسم وما عنه وعن المنصة وأذكرك وانت وش رايك؟
صديقك - عبدالملك المرشد - عرقة
- شويه حاط رجله الا داعس على الطبلون كله والله يستر لا يصدم المستشفى الشهير حولكم!
* عزيزي معوكس سلام يا غالي اشوف المنتخب ضم مصابين واحتياط في فرقهم الله يستر لا يفشلنا في البحرين ونتراجع في تصنيف الفيفا زود؟
مشعل الصيخان - حي الفلاح
- لا تخاف نصفهم حدهم الدمام!
* عزيزي معوكس تتوقع المدافع السنغالي في الهلال مانغان يغادر ويجيبون أفضل منه ولا يخلون الدرعى ترعى
مساعد العتيبي - الرياض
- مع ها الخير والامطار شكل الدرعى تبي ترعى واللي ما يعجبه يشرب من المحيط!
* احلى ناقد ساخر معوكس أقول يا حظك ما شاء الله ويا كثر اللي يغارون منك ومن شعبيتك ما حد عرض عليك دعاية موبايل اي فون ولا جلكسي؟
نواف المطيري - حي السلام
- ابدا ولا الكشاف!!
* الغالي معوكس بالله عليك معقولة اصدق أن الحكم محمد الفودة يجامل خليل جلال (بلنتي) ما هنا اوضح منه يقول ما فيه شي لا وآخرتها يرشحه لقيادة النهائي بصراحة هذي مطرسة.
عبدالعزيز ابوسعد - الشفاء
- ما دامه قال عز الله قاد النهائي ومطرسة!!