تكفى يا ميسي

نبض المدرج

الليلة سيكون "أبو العواكيس" في مقدمة حضور مباراة "الأخضر" والأرجنتين، ومن يريد أن يشوفه على الطبيعة ويصور معه من دون ما يدري صديقي المهندس سلمان النمشان عليه أن يذهب مبكرا للملعب قبل الزحمة، تخبرون ما شاء الله ملاعبنا مغرية على الرغم من خبرة ابو نمشان المحلية والدولية يجي الواحد ومكانه محجوز ورقم الكرسي على التذكرة والبوفيه المفتوح بين الشوطين والمشاوي في الساحة داخل حرم الملعب واللي مايشتري يتفرج.. معليش واحد جنبي يقول(لايكثرّ)
المهم بعد تهنئة ميسي بالمولود الجديد وسلامة "ام العيال" والسؤال عن احوال قبيلته "الميساوية" نقول له تكفى ي"ولد ابو ميسي" لايجيك "المسّ" ثم تمس الكرة من بعيد، ترى كرتنا نامية ولاعبون ماعندهم خبرة الواحد إذا فرفر فيه الهجوم الخصم شوي تفكفك رقبته والركب معها، انتم ي"ابو تياغو" تدربون سبع ساعات باليوم ومخكم كورة وتاكلون ثلاث وجبات صحية في وقت محدد ولاعبونا ماغير "ينططون" عيونهم من السهر متنفخة كأنها بالونات، ومما يزيدهم كم كيلو كسل عدم القدرة على فك الارتباط ب"الكبسة" مثلما هو عدم القدرة على فك العلاقة مع الإخفاقات في الأندية والمنتخبات، وان أحببت ياميسي وبحكم انك صديق معوكس وعمك "معرف عائلة الميساوية" نطلعك على برنامجهم اليومي فهو بعد صلاة العصر والقومة من النوم مباشرة "الهجوم على الكبسة وعسى ما أنت بخاري او فخذ دجاجة" ومن ثم الذهاب بخطى متثاقلة إلى النادي واللف على الملعب كم دقيقة وبعد التدريب "حط رجلك" مخيمات الثمامة، واستراحات لبن ومعسل الشرق و"خلاقينهم تفشل" ماغير لباس يبكي و"خماخم" يشيب منها الرأس وسلاسل كأننا في سوق الاكسسورات(ياحسرتاه راحوا الرجال مع جيل النعيمة وماجد)، وبعد ذلك كم "رأس معسل" وهز وسط بمباركة من ادارات "صب قهوة" والعودة إلى البيت الساعة سبع صباحا والواحد "يترنح" كأنك صاكه كف.
الزبدة ي" يابو تياغو" متعونا بالكورة الزينة والاداء الحلو بس إيانا وإياكم نشوف الأربعات والخمسات وحتى "الستات" في شباك "الأخضر"، لاتصيرون قشران مثل تشافي حسبي الله عليه يومه يطق طق علينا في الاعلام وفي الملعب ويحط مستوانا جنب الهندرواس والنهاية ما فرحنا إلا في مباراة الكونغو حتى ظنينا اننا جبنا كأس آسيا وفوقه التأهل إلى المونديال "هدية مجانية".
وقبل القفلة نقول لك ياميسي اللي حدث اثناء استقبال سعادتك امسحه في وجه محاكيك فهو الاعرف بالبير وغطاه، وليس محمد العرفج اللي ارعد وازبد بالامس والله يستر ما يمنع معوكس من الكتابة حتى اشعار اخر على طريقة ايقاف (الفيفا) للصديق العزيز محمد بن همام مع العلم بأن معوكس لم يكن من اصدقاء المسحل والعرفج حتى يكون على رأس مستقبليك، ويبدو انه -اي العرفج -ماخذ مقلب بادارته (وزارة الاعلام على غفلة) او هيئة الصحفيين ما درى انها ادارة ل»التشخيص والبروستيج» وجلهم منسقين يحتاجون الى تنسيق والله يستر ما تتحول الاتحادات الرياضية عقب التغييرات الجديدة في اللجنة الاولمبية الى «اتحادات التخطيط الاعلامي» وننسى شيء اسمه الالعاب الرياضية.. المهم ياميسي استر ماواجهك واللي تبيه ترانا حاضرين بس ارفق بنا ولاتحط حرة فوضى الاستقبال في مرمى وليد عبدالله!